Բրիտանական Sky հեռուստաընկերությունը վավերագրական ֆիլմ կնկարահանի Facebook-ի և Meta ընկերության հիմնադիր Մարկ Ցուկերբերգի կյանքի մասին, հաղորդում է Deadline-ը:
Ֆիլմի նախնական անվանումը «Ցուկերբերգ. Մետավերսի արքա» է, տևողությունը՝ 90 րոպե: Ֆիլմը կհամատեղի արխիվային կադրերը և բացառիկ հարցազրույցները Ցուկերբերգի մտերիմ մարդկանց հետ:
Ռեժիսորը Նիք Գրինն է, որը նախկինում նկարահանել է պատմական վավերագրական ֆիլմեր Մեծ Բրիտանիայի պատմության, Հին Հռոմի, թագավորական ընտանիքի և Պուտինի մասին:
Հիշեցնենք, որ 2010 թվականին Facebook-ի ստեղծման և Ցուկերբերգի մասին գեղարվեստական ֆիլմ է թողարկվել: Ջեսսի Այզենբերգի գլխավոր դերակատարմամբ ֆիլմն արժանացել է 4 «Ոսկե գլոբուսի» և 50 միլիոն դոլար բյուջեի դեպքում ավելի քան 224 միլիոն դոլար գումար հավաքել կինովարձույթում։
