ՊՍԺ-ի և Իտալիայի հավաքականի կիսապաշտպան Մարկո Վերատին հայտնել է Ֆրանսիայի քաղաքացիություն ստանալու մտադրության մասին։
«Մի օր ես դիմելու եմ Ֆրանսիայի քաղաքացիություն ստանալու համար, քանի որ երեխաներս ծնվել են այս երկրում։ Փարիզը ֆանտաստիկ քաղաք է, և այս երկիրն ինձ շատ բան է տվել։ Ես ինձ ֆրանսիացի եմ զգում, չնայած մնում եմ իտալացի»,- Վերատիի խոսքն է մեջբերում լրագրող Ադրիեն Գրենյեն։
Վերատին իտալական «Պեսկարայի» սան է, որի գլխավոր թիմում խաղացել է 2008-2012 թվականներին: Իտալացի կիսապաշտպանը փարիզյան թիմին միացել է 2012 թվականի հուլիսին: Վերատիի պայմանագիրը ՊՍԺ-ի հետ գործում է մինչև 2024 թվականի հունիսի 30-ը:
Մարկո Վերատին 2012 թվականի օգոստոսից է խաղում Իտալիայի ազգային հավաքականում, որի կազմում անցկացրած 49 հանդիպումներում դարձել է 3 գոլի հեղինակ: Անցյալ տարվա ամռանն նա Իտալիայի հավաքականի կազմում դարձել է Եվրոպայի չեմպիոն:
