Անգլիայի չեմպիոն «Մանչեսթեր Սիթիի» պորտուգալացի կիսապաշտպան Բեռնարդու Սիլվան պատրաստ է այս ամառ հրաժարվել կատալոնական «Բարսելոնա» տեղափոխվելուց և ամբողջությամբ նվիրվել ներկայիս թիմին, հայտնում է The Athletic-ը:
28-ամյա ֆուտբոլիստը կենտրոնացած է Պրեմիեր լիգայի նոր մրցաշրջանի վրա և առնվազն մեկ տարով հետաձգել է այլ ակումբ տեղափոխվելը։ Բացի այդ, անգլիական ակումբը կարծում է, որ Բերնարդու Սիլվան շուտով պատրաստ կլինի քննարկել «Մանչեսթեր Սիթիի» հետ պայմանագրի ժամկետի երկարաձգման հարցը։
Ավելի վաղ հաղորդվում էր, որ կիսապաշտպանի նկատմամբ հետաքրքրություն է ցուցաբերում «Բարսելոնան», սակայն «Մանչեսթեր Սիթիի» ղեկավարությունը մտադիր չէ բաց թողնել ֆուտբոլիստին 100 միլիոն եվրոյից պակաս գումարով։
Ֆուտբոլիստի գործող պայմանագիրը «Մանչեսթեր Սիթիի» հետ նախատեսված է մինչև 2025 թվականի հունիսի 30-ը։ Transfermarkt-ը Պորտուգալիայի հավաքականի կիսապաշտպանի տրանսֆերային արժեքը գնահատում է 80 միլիոն եվրո։