2024 թվականի մարտի 1-ին կայացավ «Բարի օր» ֆիլմի պրեմիերան։ Գլխավոր հերոսը տաքսիստ Հենդոն է, ով տարիներ շարունակ արթնանում է հոկտեմբերի 14-ին, իսկ օրն ու իրադարձությունները տևական ժամանակ չեն փոխվում։ Ֆիլմի հաջողությունից հետո ստեղծագործական կազմը որոշեց նկարահանել նաև երկրորդ մասը։ «Բարի օր 2»-ի պրեմիերան փետրվարի 6-ին է։ Մինչև այդ գլխավոր դերակատար Մհեր Մխիթարյանն ու ռեժիսոր Արման Սարգսյանը «ԼուրջCast» հաղորդման ընթացքում խոսել են ֆիլմի մասին։
Դեռ կորոնավիրուսի ժամանակ Մհերը նկատել է, որ մարդիկ չեն ժպտում։ Եթե նույնիսկ ժպտում են, դիմակի տակից չի երևում։ Այդ ժամանակ էլ դերասանը որոշել է անել այնպիսի բան, որ մարդիկ ժպտան ու դա տեսնեն բոլորը։ «Մեքենայում նստած հորինեցի տաքսիստ Հենդոյի կերպարը։ Ուղարկեցի Արմանին, ասաց՝ աշխատող կերպար է։ Քանի որ մեքենա չունեմ, տաքսիստներից լսել եմ ֆիլմում հնչող բոլոր արտահայտությունները։ Ուրախ եմ, որ ֆիլմը դրական արդյունք է ունեցել։ Մարդ է եղել ֆիմը նայելուց հետո ծաղիկ է նվիրել կնոջը։ Ընկերներ ունեմ, ովքեր ֆիլմից հետո որոշել են ավարտել սիրուհիների հետ կապը։ Ստացվում է՝ 1 ժամ, 40 րոպեանոց ֆիլմը կարող է նման ազդեցություն ունենալ», - խոստովանել է դերասանը։ Նրա խոսքով՝ երկրորդ մասում հանդիսատեսը տեսնելու է ուրիշ և շատ ծիծաղելի ֆիլմ։ Կերպարները նույնն են, իրադարձությունները՝ այլ։
Ըստ Արման Սարգսյանի՝ հանդիսատեսը տեսնելու է նոր Հենդոյի։ ««Բարի օր» առաջին ֆիլմում կար հրաշքի գործոն։ Երբ մտածում էինք երկրորդ մասի մասին, որոշեցինք, որ այստեղ ևս պետք է այդ գիծը շարունակենք։ Պարզապես առաջին մասում մարդկանց հետ նման հրաշքներ չէին լինում, իսկ երկրորդում՝ մարդկանց ծանոթ իրավիճակներ ենք նկարել։ Այսինքն՝ այդ հրաշքը բոլորի հետ կարող է լինել», - բացահայտել է ռեժիսորը։ Արմանը վստահեցրել է՝ Մհերն ամբողջությամբ զգում է կերպարը։ Նա նկարահանվել է բոլոր տեսարաններում։ Շատ քիչ ֆիլմեր կան, որ նման հերոսներ ունեն։ «Կերպարը վերցված է մեր կյանքից։ Այդ պատճառով էլ մարդկանց վրա ազդեցություն է ունենում։ Եթե լիներ այլ կերպար, հնարավոր է մարդկանց չհետաքրքրեր», - անկեղծացել է Արմանը։ Նա տեղեկացրել է, որ ռուսները հավանել են ֆիլմի սցենարը։ Պատրաստվում են գնել, որպեսզի նկարահանեն իրենց տարբերակը։ Արմանը խոսել է նաև հայկական կինոարտադրության խնդիրների մասին։ Նրա խոսքով՝ հիմնական խնդիրը ֆինանսն է և հովանավորները։ Իր համար նաև քասթինը։ Խոստովանում է՝ դժվար է ընտրում դերասաններին։ Ըստ նրա՝ կա նաև սցենարիտսների պակաս։