Օրեր առաջ՝ հոկտեմբերի 24-ին, Հայաստանի նկարիչների միությունում տեղի ունեցավ նկարիչ-քանդակագործ Ռաֆայել Ջավախյանի «Հոգուս գույներով» խորագիրը կրող անհատական ցուցահանդեսը:
Ռաֆայել Ջավախյանի մասին…
Նկարիչ-քանդակագործ Ռաֆայել Ջավախյանը ծնվել է Լոռու մարզի Ալավերդի քաղաքում: Նա հավասարապես զբաղվում է և՛ գեղանկարչությամբ և՛ քանդակագործությամբ:
Արվեստագետի գեղանկարները և քանդակները գտնվում են ԱՄՆ-ում, Ֆրանսիայում, Ավստրիայում, Ռուսաստանում՝ մասնավոր հավաքածուներում։ Իրականացրել է բազմաթիվ գրքերի և թատերական ներկայացումների ձևավորումներ, հեղինակ է մի շարք հուշատախտակների:
1986 թվականից առ այսօր Հայաստանի ազգային պատկերասրահի Ալավերդու մասնաճյուղի տնօրենն է:
Ջավախյանի արվեստը
Ջավախյանն անհատական ցուցահանդեսներ շատ է ունեցել, թե՛ Հայաստանի տարբեր մասերում, թե՛ Արցախում և թե՛ արտերկրում: Հայաստանի նկարիչների միությունում հեղինակի առաջին ցուցահանդեսն էր, որտեղ ներկայացված էին արվեստագետի գեղանկարներն ու քանդակները:
Ջավախյանի խոսքով. «Մի ձեռքս նկարում է, մի ձեռքս քանդակում»:
Ցուցահանդեսում ներկայացված ստեղծագործությունների ոգեշնչման աղբյուրը հայրենի աշխարհն է, Լոռին, բնությունը: Նկարչի գունապնակի վառ ու տաք երանգները ցուցասրահը յուրահատուկ տարամադրությամբ են լցնում և սրահով շրջելիս տպավորություն է, թե Ջավախյանի կտավները թումանյանական լոռվա պատկերն են վեարստեղծում:
«Նկարելու ժամանակ, երբ կանգնած եմ կտավի առջև՝ վերանում եմ ատաքին աշխարհից: Սովորաբար շատ արագ եմ նկարում, և առօրյայից վերանալով արագ ավարտում եմ ստեղծագործություններս», – նշում է նկարիչը:
Ռաֆայել Ջավախյանի տաղանդն արտահայտվում է նաև քանդակագործության մեջ: Ունի մոնումենտալ երեք քանդակ Ալավերդիում («Քաջ Նազար», «Հառաչանք», «Ծնունդ»), խաչքարեր, որոնց մի մասը արտերկրում է՝ Շվեյցարիայում, Ռուսաստանում, Ավստրիայում:
