Ռուսաստանաբնակ ռեժիսոր Սարիկ Անդրեասյանը Telegram-ի իր ալիքում հայտարարել է «Մանյունյա» մուլտսերիալի աշխատանքի մեկնարկի մասին։
Կինոռեժիսորը ցուցադրել է նաև հերոսների և վայրերի առաջին էսքիզները: Մասնավորապես, Անդրեասյանը հրապարակել է գլխավոր հերոսուհու՝ Նարինեի, տատիկի ու հոր, ինչպես նաև Մանյունյայի տան նկարները։
Հիշեցնենք, որ օրեր առաջ էլ գրող Նարինե Աբգարյանն էր իր ֆեյսբուքյան էջում հայտնել, որ իր «Մանյունյա» հայտնի ստեղծագործության հիման վրա եռաչափ անիմացիոն սերիալ կնկարահանվի: Սերիալը կունենա 52 դրվագ, 52 նոր պատմություն, քանի որ պրոդյուսերները որոշել են ամբողջությամբ չկրկնօրինակել գիրքը:
Սերիալը կնկարահանի Asymmetric VFX ստուդիան, ռեժիսորը կլինի Վիկտոր Լակիսովը։
Ստեղծագործության հերոսները՝ Նարկա, Մանյունյա, Կարինկա, Բա, Մանյունյայի տունը․
«Մանյունյա»-ի մասին...
«Մանյունյան» լուսավոր, արևով ու հայկական բերքուբարիքի համուհոտով ներծծված մի արտասովոր պատմություն է Բերդում անցկացրած մանկության, երկու ընկերուհիների՝ Նարինեի ու Մանյունյայի, խիստ ու բարի Տայի՝ Մանյունյայի տատիկի, շարունակ խառնաշփոթ իրավիճակներում հայտնվող բազմաթիվ ազգականների մասին: Քնքուշ ու ծիծաղաշարժ դիպվածքներով լի մանկություն, որ մարդուն երջանիկ է դարձնում ամբողջ կյանքում։ Գիրքը հասցեագրված է չափահաս մանուկներին և պատմում է այն զարմանալի մարդկանց մասին, որոնք ինչ-որ կերպ հաջողացրել են մեծանալ առանց WiFi-ի ու համակարգչային խաղերի:
