UFC-ի կիսածանր և ծանր քաշային կարգերի նախկին չեմպիոն Ջոն Ջոնսն անդրադարձել է կազմակերպության նախագահ Դանա Ուայթի այն հայտարարությանը, որ չի կարող ռիսկի դիմել` լեգենդար ամերիկացի մարտիկին վստահելով հաջորդ տարվա ամռանը Սպիտակ տան տարածքում սպասվող տիտղոսային մենամարտը:
«Ես տեսա այդ մեկնաբանությունները։ Իհարկե, ես մի փոքր հիասթափված եմ։ Բայց ես մնում եմ UFC-ի դոպինգ- թեստավորման խմբի մեջ, մնում եմ լավ մարզավիճակում և շարունակում եմ մարզվել պրոֆեսիոնալի նման։ Ես պատրաստ եմ ցանկացած բանի։
Վերջերս մի հարցազրույցում ասացի, որ Սպիտակ տանը մենամարտելու հնարավորությունն ինձ ավելի խոր մոտիվացիա է տվել։ Իմ երկրի համար մենամարտելն ավելի մեծ նպատակ է, քան գումարը:
Պատմության լավ կողմն այն է, որ երկրպագուները տեսնում են իմ սիրտը։ Նրանք տեսնում են, որ ես պատրաստ եմ մենամարտել ցանկացածի հետ՝ Միացյալ Նահանգները պատմական բեմում ներկայացնելու համար։ Ինձ համար երբեք խնդիրը մրցակիցը չի եղել։ Ես փնտրում եմ ժառանգություն, անմահություն, ինչ-որ բան, որը ավելի մեծ է, քան անմիջական հաջողությունը։
Այսպիսով՝ ես շարունակելու եմ պայքարել, շարունակելու եմ դիմանալ և շարունակելու եմ հավատալ։ Ես պատրաստ եմ մենամարտել հուլիսի 4-ին», - գրել է Ջոնսը սոցցանցերում:
38-ամյա Ջոնսն օկտագոնում ունի 28 հաղթանակ և մեկ պարտություն:
