Գերմանիայի չեմպիոն Մյունխենի «Բավարիան» և Իտալիայի չեմպիոն «Միլանը» դուրս եկան ՈւԵՖԱ-ի Չեմպիոնների լիգայի խաղարկության քառորդ եզրափակիչ:

1/8 եզրափակիչի պատասխան խաղում «Բավարիան» տանը 2-0 հաշվով ուժեղ գտնվեց Ֆրանսիայի չեմպիոն ՊՍԺ-ից, որին հաղթել էր նաև հյուրընկալվելիս (1-1):

Հանդիպման առաջին խաղակեսն անցավ հավասար պայքարում, ամենավտանգավոր պահը ստեղծվեց «Բավարիայի» շվեյցարացի դարպասապահ Յան Զոմերի սխալից հետո, երբ դարպասը չկարողացավ գրավել ՊՍԺ-ի պորտուգալացի կիսապաշտպան Վիտինյան: Այդ դրվագում գնդակը դարպասային գծի վրայից հեռացրեց «Բավարիայի» հոլանդացի պաշտպան Մատեյս դե Լիխտը:

Երկրորդ խաղակեսի մեկնարկից 7 րոպե անց «Բավարիայի» կամերունցի հարձակվող Էրիկ Մաքսիմ Չուպո-Մոտինգը գլխի հարվածով բացեց հաշիվը, սակայն մրցավարը չեղարկեց գոլը, քանի որ խաղից դուրս վիճակում գտնվող գերմանացի հարձակվող Թոմաս Մյուլերը փակել էր ՊՍԺ-ի իտալացի դարպասապահ Ջանլուիջի Դոնարումայի տեսադաշտը:

Չեղարկված գոլից ընդամենը 8 րոպե անց Չուպո-Մոտինգը կրկին գրավեց նախկին թիմի դարպասը, որն արձանագրվեց: Գոլի դրվագում կոպիտ սխալ թույլ տվեց ՊՍԺ-ի իտալացի կիսապաշտպան Մարկո Վերատին, որը սեփական տուգանային հրապարակում կորցրեց գնդակը։

Հանդիպման հիմնական ժամանակի ավարտից մեկ րոպե առաջ «Բավարիան» փոխարինման դուրս եկած ֆուտբոլիստների շնորհիվ հակագրոհ կազմակերպեց, պորտուգալացի պաշտպան Ժոաու Կանսելուի փոխանցումից հետո խաղի վերջակետը դրեց Գերմանիայի հավաքականի վինգեր Սերժ Գնաբրին՝ 2-0:

ՊՍԺ-ն երկրորդ տարին անընդմեջ Չեմպիոնների լիգայում պայքարն ավարտում է 1/8 եզրափակիչից:

Օրվա մյուս խաղում «Տոտենհեմը» Լոնդոնում ընդունեց Իտալիայի չեմպիոն «Միլանին»: Խաղն անցավ հավասար պայքարում, դարպասի գրավում չեղավ: «Տոտենհեմը» 77-րդ րոպեից խաղում էր 10 ֆուտբոլիստներով, կարմիր քարտ էր ստացել արգենտինացի պաշտպան Քրիստիան Ռոմերոն:

Ստեֆանո Պիոլիի գլխավորած «Միլանը» դուրս եկավ քառորդ եզրափակիչ, քանի որ դիմակայության առաջին խաղում հաղթել էր 1-0 հաշվով:

Հիշեցնենք, որ ավելի վաղ Չեմպիոնների լիգայի քառորդ եզրափակիչի ուղեգիր էին նվաճել նաև Լոնդոնի «Չելսին» ու Լիսաբոնի «Բենֆիկան»։ 1/4 եզրափակիչի զույգերը կձևավորվեն վիճակահանությամբ:

Չեմպիոնների լիգա, 1/8 եզրափակիչ, պատասխան հանդիպումներ

«Բավարիա» (Գերմանիա) - ՊՍԺ (Ֆրանսիա)` 2-0 (առաջին խաղը՝ 1-0) (տեսանյութ)

Էրիկ Մաքսիմ Չուպո-Մոտինգ, 61, Սերժ Գնաբրի, 89

«Տոտենհեմ» (Անգլիա) - «Միլան» (Իտալիա)` 0-0 (առաջին խաղը՝ 0-1) (տեսանյութ)

Հեռացում՝ Քրիստիան Ռոմերո, 77 («Տոտենհեմ»)