Հուլիսի 13-ին Երևանում նախատեսված խառը մենամարտերի Mix Fight 58 մրցաշարը հետաձգվել է և կկայանա սեպտեմբերին, հայտնում է կազմակերպության մամուլի ծառայությունը:

«Տեղեկացնում ենք, որ Mix Fight 58 մրցաշարը, որը նախատեսված էր հուլիսի 13-ին, կկայանա սեպտեմբերին։

Սա պայմանավորված է միջազգային առաջատար այն հեռուստաընկերությունների մեծ հետաքրքրությամբ, որոնք ցանկացել են հեռարձակել մրցաշարը։

Միջազգային մի շարք հեռուստաընկերություններ տեղեկացրել են, որ հուլիսին տեխնիկապես անհնար է ապահովել ուղիղ եթերի հեռարձակումը՝ եթերային ծանրաբեռնվածության պատճառով։ Նրանք առաջարկել են միջոցառումն անցկացնել սեպտեմբերին, որպեսզի կարողանան իրականացնել հեռարձակում։

Մրցաշարի հետաձգումը սեպտեմբեր թույլ կտա Mix Fight 58-ը հեռարձակել 75-ից ավելի երկրում, զգալիորեն բարձրացնել միջոցառման միջազգային ճանաչումը, որը կբերի նոր հնարավորություններ հայ մարզիկների համար։

Այս ամենը հաշվի առնելով՝ Հայաստանի Mix Fight ֆեդերացիայի ղեկավար կազմը որոշում է կայացրել ընդառաջել հեռուստաընկերություններին։

Mix Fight 58-ի անցկացման նոր ամսաթիվը կհայտարարենք շուտով»,- ասված է պաշտոնական հաղորդագրության մեջ:

Երեկոյի ընթացքում կկայանա 12 մենամարտ, որից 8-ը՝ MMA-ի կանոններով, 2-ը՝ քիքբռնցքամարտի, 2-ը՝ մուայթայի։

Mix Fight 58-ը կանցկացվի «Դինամո» մարզահամալիրում, կմասնակցեն մի քանի երկրներից ուժեղագույն մարզիկներ։