Եվրագավաթների մասնակից հայկական 4 թիմերից 3-ը մրցաշարին կներկայանան նոր գլխավոր մարզիչների գլխավորությամբ: Ընդ որում նրանցից երկուսը՝ «Նոան» գլխավորած խորվաթ մասնագետ Սանդրո Պերկովիչը և «Արարատ-Արմենիայի»  նորանշանակ մարզիչ Տուլիպան իրենց նորամուտն են նշելու հայկական ֆուտբոլում:

Իսկ «Ուրարտուն» կրկին գլխավորած Ռոբերտ Արզումանյանը թիմի գլխավոր մարզչի պաշտոնում նորամուտը Եվրագավաթներում նշել էր 2021թ. հուլիսի 8-ին: Այդ օրն «Ուրարտուն» Կոնֆերենցիաների լիգայի խաղարկության որակավորման առաջին փուլում հյուրընկալվելիս նվազագույն հաշվով զիջել էր Սլովենիայի «Մարիբորին»: Պատասխան խաղում էլ «Ուրարտուն» կրկին պարտվել էր նույն հաշվով:

1994թ. մինչ օրս Եվրագավաթներին մասնակցած հայկական ակումբներն ընդհանուր առմամբ գլխավորել են 52 մարզիչներ: Եղիշե Մելիքյանը մի քանի ցուցանիշներով ռեկորդակիր է մարզիչների մեջ: Նրա գլխավորած թիմերը Եվրագավաթներում բոլորից շատ՝ 29 խաղ են անցկացրել և առավել հաճախ՝ 11 անգամ հաղթել են մրցակիցներին: Փորձառու մարզչին հաջողվել է 6 անգամ հաղթահարել մրցակիցների արգելքը:

Ինչպես հայտնի է, Եղիշե Մելիքյանը Հայաստանում մարզչական գործունեությունը սկսել է «Ալաշկերտում», որի գլխավոր մարզչի պաշտոնում էլ նշել է նորամուտը Եվրագավաթներում: Այն հաջող չէր Մելիքյանի համար: 2020թ. օգոստոսի 27-ին Եվրոպա լիգայի որակավորման առաջին փուլում «Ալաշկերտը» սեփական դաշտում նվազագույն հաշվով պարտվեց Հս. Մակեդոնիայի «Ռենովային» ու դուրս մնաց հետագա պայքարից, քանի որ կորոնավիրուսի համաճարակի պատճառով դիմակայությունը մեկ խաղից էր:

Իսկ ահա «Փյունիկի» գլխավոր մարզչի պաշտոնում Մելիքյանի նորամուտը Եվրագավաթներում շատ հաջող է ստացվել: Նրա գլխավորությամբ փյունիկցիները 2022/23թթ. Չեմպիոնների լիգայի որակավորման առաջին փուլում հաղթահարել են ռումինական «Կլուժի» արգելքը: Առաջին խաղում սեփական դաշտում գրանցվել էր գոլազուրկ ոչ-ոքի, հյուրընկալվելիս մրցակիցները 2-ական գնդակ էին փոխանակել, իսկ հետխաղյա 11մ հարվածաշարում 4-3 հաշվով հաղթել էր «Փյունիկը»:

Եվրագավաթների այդ խաղարկությունում Եղիշե Մելիքյանը մարզիչների մեջ ևս մեկ ինքնատիպ նվաճման հասավ՝ դառնալով միակը, որի գլխավորած թիմը հանդես է եկել Չեմպիոնների լիգայի որակավորման 3-րդ փուլում: Այդ փուլի ուղեգիրը  «Փյունիկը» նվաճել էր Լյուքսեմբուրգի «Դյուդելանժի» հետ երկխաղյա դիմակայությունում հաղթելու շնորհիվ՝ 0-1, 4-1:

Եվրագավաթների նախորդ խաղարկությունում յուրօրինակ ռեկորդ սահմանեց «Նոայի» արդեն նախկին գլխավոր մարզիչ Ռուի Մոտան: Պորտուգալացի մասնագետը Եվրագավաթներում նորամուտը 3 անընդմեջ հաղթանակով նշած միակ մարզիչն է: Նրա գլխավորությամբ «Նոան» Կոնֆերենցիաների լիգայի մրցաշարում հաղթել էր «Շկենդիային» (2-0, 2-1) և Մալթայի «Սլիմա Ուոնդերերսին» (7-0): Էլ ավելի տպավորիչ էր Մոտայի մեկ այլ ռեկորդային ցուցանիշը: Նրա սաներին հաջողվեց հաջորդաբար պայքարից դուրս մղել իր բոլոր 4 մրցակիցներին:

Եվրագավաթներին մասնակցած հայկական ակումբների 52 մարզիչներից միայն 12-ին է հաջողվել նորամուտը հաղթանակով նշել: FastNews-ը ներկայացնում է նրանց ցանկը: