Ֆուտբոլի Հայաստանի երիտասարդական հավաքականը շարունակում է նախապատրաստվել Կիպրոսի թիմի դեմ տնային ընկերական հանդիպումներին:
ՀՖՖ TV-ն հերթական մարզումից հետո զրուցել է ԲԿՄԱ-ի ներկայացուցիչ Միսակ Հակոբյանի և գերմանական «Հանովերից» Մարկ Գևորգյանի հետ:
Միսակ Հակոբյան. «Ամեն ինչ շատ ավելի հեշտ է, երբ ակումբում ու հավաքականում մարզիչը նույն մարդն է։ Մենք լավ հասկանում ենք, թե նա ինչ է ուզում մեզնից, և փորձում ենք կատարել ամեն ինչ։ Հավաքականում հիմա շատ նորեկներ կան՝ տարբեր երկրներից, բայց մենք շատ լավ հարաբերություններ ունենք։ Թեպետ նոր ենք ծանոթացել, արդեն զգում ենք, որ թիմ ենք դարձել։ Ես, օրինակ, կարող եմ Մարկի և նրա եղբոր՝ Մայքի հետ խոսել գերմաներեն։ Փորձում ենք օգնել մեր բոլոր լեգեոներներին, որպեսզի հեշտությամբ ադապտացվեն ու ամեն ինչ հասկանան։ Մեր հաղթելու շանսերը բարձր են. լրջորեն պատրաստվում ենք խաղին ու կենտրոնացած ենք միայն արդյունքի վրա»։
Մարկ Գևորգյան. «Ինձ ֆուտբոլ է բերել հայրս։ Հորս են զանգել և ասել, որ ինձ հրավիրում են հավաքական։ Նա հարցրեց ինձ՝ դու իսկապես ուզո՞ւմ ես խաղալ Հայաստանի երիտասարդական հավաքականում: Ես առանց երկմտելու պատասխանեցի՝ այո։ Դա ինձ համար մեծ ուրախություն է։ Ինձ զգում եմ Հայաստանի հավաքականի մի մասնիկը։ Թիմում հաղորդակցման խնդիրներ չկան. ոմանք խոսում են հայերեն, ոմանք՝ ռուսերեն, ոմանք՝ անգլերեն, և մենք բոլորս իրար հետ լեզու ենք գտնում»։
Հայաստանի և Կիպրոսի Մ21 հավաքականների առաջին խաղը տեղի կունենա հունիսի 3-ին Ավանի ակադեմիայում, երկրորդը` երեք օր անց Վազգեն Սարգսյանի անվան «Հանրապետական» ստադիոնում:
