Հունահռոմեական ոճի ըմբշամարտի Հայաստանի հավաքականի անդամներ Մալխաս Ամոյանը (77 կգ) և Արթուր Ալեքսանյանը (97 կգ) գլխավոր մարզիչ Արմեն Բաբալարյանի և մարզիչ Գևորգ Ալեքսանյանի ուղեկցությամբ ժամանել են Փարիզի օլիմպիական ավան:
Հայաստանի ազգային օլիմպիական կոմիտեի մամուլի ծառայությունը հունահռոմեականների ժամանումից տեսանյութ է հրապարակել:
Հունահռոմեական ոճի ըմբշամարտի Հայաստանի հավաքականից Փարիզի 33-րդ ամառային Օլիմպիական խաղերին կմասնակցի նաև Սլավիկ Գալստյանը (63 կգ), որը մրցավայր կմեկնի օրեր անց:
Հիշեցնենք, որ աշխարհի չեմպիոն, Եվրոպայի առաջնությունների եռակի ոսկե մեդալակիր Ամոյանն ու Օլիմպիական խաղերի ոսկե, արծաթե և բրոնզե մեդալակիր, աշխարհի քառակի և Եվրոպայի 7-ակի չեմպիոն Ալեքսանյանը պայքարի մեջ կմտնեն օգոստոսի 6-ին, հաջորդ օրն էլ գորգ դուրս կգա Գալստյանը:
