Fastex Պրեմիեր լիգայի 29-րդ տուրում «Նոայի» հաղթարշավն ընդհատվեց և չեմպիոնության գրանցումն էլ հետաձգվեց: «Արարատ-Արմենիան» և «Ուրարտուն» խոշոր հաշվով հաղթելով, շարունակում են պայքարը մեդալների համար:
FastNews-ը տուրի ամենաուշագրավ իրադարձությունները ներկայացնում է 10 փաստի տեսքով:
1. Տուրն անցավ դաշտի տերերի առավելությամբ, որոնք 3 հաղթանակ տոնեցին, մեկ խաղ ավարտեցին ոչ-ոքի, կրեցին մեկ պարտություն: Հյուրերից միակ հաղթանակը տարավ ԲԿՄԱ-ն: Առաջնությունում կայացած 142 հանդիպումներից 60-ում հաղթել են դաշտի տերերը, 59-ում հաջողությունն ուղեկցել է հյուրերին, 23 խաղում էլ գրանցվել է ոչ-ոքի:
29-րդ տուրն ամենաարդյունավետն էր առաջնության գարնանային հատվածում: Կայացած 5 հանդիպումներում խփվեց 22 գոլ (միջինը մեկ խաղում՝ 4,4 գոլ): Իսկ ռեկորդային ցուցանիշը գրանցվել է 3-րդ և 11-րդ տուրերում, որոնցում 24-ական գոլ է խփվել: Առաջնության 142 հանդիպումներում գրանցվել է 440 գոլ (միջինը մեկ խաղում՝ 3,09 գոլ):
2. «Արարատ-Արմենիան» ընթացիկ առաջնությունում 6-րդ անընդմեջ հաղթանակը տոնեց, որից 4-ը՝ խոշոր հաշվով: Այդ խաղերում գործող գավաթակիրն ընդհանուր առմամբ 21 գոլ է խփել: Ընթացիկ առաջնությունում Վարդան Մինասյանի գլխավորած թիմը խոշոր հաշվով 9-րդ հաղթանակը տոնեց:
3. «Վանն» ընդհատեց «Նոայի» 19 անընդմեջ հաղթանակների ռեկորդային շարքը՝ Չարենցավանում կայացած խաղում գրանցելով մարտական ոչ-ոքի՝ 2-2: Այդ շարքը սկսվել էր անցյալ տարվա հոկտեմբերի 16-ին «Ալաշկերտի» նկատմամբ տարած հաղթանակով՝ 6-0: «Վանի» հետ անցկացրած առաջնության վերջին 11 հանդիպումներում «Նոան» անպարտելի է՝ տոնելով 6 հաղթանակ, 5 խաղ ավարտելով ոչ-ոքի: Վերջին հաղթանակը «Նոայի» նկատմամբ «Վանը» տոնել է 2022թ. մայիսի 21-ին Չարենցավանում կայացած խաղում՝ 1-0:
«Նոան» առաջնությունում նախորդ անգամ միավոր էր կորցրել անցյալ տարվա սեպտեմբերի 29-ին՝ 1-2 հաշվով պարտվելով «Ուրարտուին»:
4. Գրանցվեց ընթացիկ առաջնության ամենախոշոր հաշիվը: «Ուրարտուն» 8 անպատասխան գնդակ խփեց «Վեստ Արմենիայի» դարպասը: Մինչև այդ ամենախոշոր հաշիվը գրանցվել էր «Նոա»-«Գանձասար» խաղում՝ 7-0: «Վեստ Արմենիան» Fastex Պրեմիեր լիգայում ամենախոշոր հաշվով պարտությունը կրեց՝ գերազանցելով իր նախորդ հակառեկորդը («Վան»՝ 0-6, «Նոա»՝ 1-7):
Իսկ «Ուրարտուն» ՀՀ առաջնություններում իր ամենախոշոր հաշվով հաղթանակները տոնել է 1992 («Կիլիկիա»՝ 12-0) և 1993թթ. («Քասախ»՝ 13-1):
5. Կարեն Մելքոնյանն իր կարիերայում առաջին անգամ հեթ-տրիկի հեղինակ դարձավ: Ընթացիկ առաջնությունում խփած գոլերի քանակը հասցնելով 7-ի, Մելքոնյանն արդյունավետության անձնական ռեկորդ սահմանեց: Նախկինում նա առավելագույնը 4-ական գոլ էր խփել 2018/19, 2021/22 և 2022/23թթ. առաջնություններում:
6. Արայիկ Էլոյանի դուբլը պատմական հաղթանակ պարգևեց ԲԿՄԱ-ին, որն առաջինն էր «Փյունիկի» նկատմամբ Հայաստանի առաջնություններում: Մինչև այդ մրցակիցների միջև կայացած 15 խաղերից 13-ում հաղթել էր «Փյունիկը», 2-ում գրանցվել էր ոչ-ոքի:
Էլոյանն ընթացիկ առաջնությունում 2-րդ անգամ դուբլ գրանցեց և 9 գնդակով ոչ միայն գլխավորեց ԲԿՄԱ-ի լավագույն ռմբարկուների ցանկը, այլև դարձավ մրցաշարի ամենաարդյունավետ հայ ֆուտբոլիստը: Նա նաև թիմի կազմում մեկ մրցաշրջանի արդյունավետության նոր ռեկորդ սահմանեց՝ գերազանցելով նախկին բանակային Գրենիկ Պետրոսյանի ցուցանիշը, որը նախորդ առաջնությունում ԲԿՄԱ-ում 8 գոլ էր խփել:
7. Տենտոն Յենեն առաջնության 2-րդ անընդմեջ խաղում դուբլի հեղինակ դարձավ: Ընթացիկ առաջնությունում նիգերիացի ֆուտբոլիստը 3-րդ դուբլը ձևակերպեց, գոլերի քանակը հասցրեց 15-ի ու Մարիուս Նուբիսիի հետ գլխավորեց «Արարատ-Արմենիայի» լավագույն ռմբարկուների ցանկը: «Շիրակի» դարպասը Տենտոնի խփած առաջին գոլը հոբելյանական՝ 40-րդն էր «Արարատ-Արմենիայի» կազմում Fastex Պրեմիեր լիգայում:
8. Արտեմի Գունկոն բացեց գոլերի հաշիվը Fastex Պրեմիեր լիգայում, իսկ Խարիտոն Այվազյանն առաջին գոլը խփեց «Ուրարտուի» կազմում:
9. Ալաշկերտցի Արմեն Մանուչարյանը Fastex Պրեմիեր լիգայում հոբելյանական՝ 200-րդ խաղն անցկացրեց: Ռուդիկ Մկրտչյանն էլ «Շիրակի» կազմում Fastex Պրեմիեր լիգայում 100-րդ անգամ խաղադաշտ դուրս եկավ:
10. Միսակ Հակոբյանը ԲԿՄԱ-ի կազմում բոլոր մրցաշարերում հոբելյանական՝ 100-րդ խաղն անցկացրեց: Դանիել Աղբալյանից (125 խաղ) և Արամ Խամոյանից (101) հետո նա դարձավ ԲԿՄԱ-ում 100 խաղի սահմանը հատած 3-րդ ֆուտբոլիստը:
