Սա Ֆորմուլա 1-ի աշխարհի կրկնակի չեմպիոն Ֆեռնանդո Ալոնսոյի ռադիոհաղորդագրությունն է իր ինժեներին 2025 թվականի Էմիլիա Ռոմանիայի Գրան պրիի ընթացքում։ Այդ պահին Ֆեռնանդոն 14-րդ տեղում էր, թեև մեկնարկել էր 5-րդից։ Թիմային թերի մարտավարության պատճառով Ֆեռնանդոն հերթական անգամ չկարողացավ առաջին միավորները վաստակել։ Հիմա ունի 2 միավոր, բայց արդյոք նա այնքան անհաջողա՞կ է, որքան կարծում է։

Ընթացիկ մրցաշրջանը Ֆեռնանդոյի համար բարդագույններից է կարիերայում։ Նա իր նորամուտը արքայական ավտոսպորտում նշել է 2001-ին «Մինարդիի» կազմում։ Դա եղել է միակ մրցաշրջանը, երբ Ալոնսոն միավոր չի վաստակել, իսկ մրցաշրջանները նրա կարիերայում արդեն 22-ն են։ Այս տարի իսպանացին գերազանցել է կարիերայի հակառեկորդներից մեկը. 8 Գրան պրի անընդմեջ Ալոնսոն միավոր չի վաստակել: Նախորդ վատագույն ցուցանիշը նա գրանցել էր 2015 թվականին, երբ առաջին միավորները վաստակեց հենց 8-րդ Գրան պրիում։

«Ասթոն Մարտինն» այս տարի լավագույն մարզավիճակում չէ, բայց այդ բոլիդն ամենաանհուսալին էլ չէ: Ալոնսոն արդեն 3 Գրան պրիում վաղաժամ ավարտել է ելույթները բոլիդի խնդիրների պատճառով։ Նույնիսկ Մոնակոյում, որտեղ նա մեկնարկեց 6-րդ տեղից, միավոր չվաստակեց։ Առաջին միավորները եկան 9-րդ Գրան պրիի ժամանակ Իսպանիայում, որտեղ նա 2 միավոր վաստակեց՝ զբաղեցնելով 9-րդ տեղը: Հունիսի 15-ին Ալոնսոն հերթական միավորները վաստակեց. Կանադայի Գրան պրիում նա զբաղեցրեց 7-րդ տեղը՝ վաստակելով 6 միավոր: Այժմ իսպանացու ակտիվում կա 8 միավոր:

Կարիերայի ընթացքում Ֆեռնանդոյին մեկ անգամ չէ, որ հետապնդել են անհաջողությունները։ Նա առնվազն ևս 2 անգամ կարող էր չեմպիոնական կոչման արժանանալ, բայց հանգամանքները նրա դեմ են դասավորվել։

2007 թվական, Ֆեռնանդոն գնում էր 3-րդ անընդմեջ չեմպիոնության հետևից, մրցաշրջանի վերջին Գրան պրիից առաջ էլ աղյուսակում երկրոդն էր, 4 միավորով էր հետ Հեմիլթոնից, 5 միավորով էլ գերազանցում էր Ռայկոնենին։ Գրան պրիի հենց սկզբում Լյուսը խնդիրներ ունեցավ, Կիմին առաջինն  էր, Ալոնսոն՝ երրորդը, բայց իսպանացու բոլիդի հետ ևս խնդիրներ առաջացան։ Արդյունքում չենպիոնությունը նվաճեց մրցափուլի հաղթող Կիմի Ռայկոնենը 110 միավորով, Ֆեռնանդոն ու Լյուսն ունեին 109-ական միավոր։

Եվս մեկ ձախողում Ալոնսոն ունեցավ 2012-ին։ Արդեն «Ֆերարիի» կազմում նա պայքարում էր Սեբաստիան Ֆետելի դեմ։ Ամառային դադարին ընդառաջ Ֆեռնանդոն մրցակցին գերազանցում էր 41 միավորով, բայց երկրորդ հատվածում Ֆետելի «Ռեդ Բուլը» բացեց թևերը։ Սրան զուգահեռ՝ մնացած էտապներից երկուսում Ֆեռնանդոյի բոլիդը խափանվեց, ու նա դուրս մնաց պայքարից: Դա էլ բախտորոշ եղավ, որովհետև մրցաշրջանի վերջում չեմպիոնի հետ միավորների տարբերությունն ընդամենը 3 էր։ Ընդ որում՝ վերջին Գրան պրին հաղթեց Ֆետելի թիմակից Մարկ Ուեբերը, որը կարողացավ թիկունքում պահել Ալոնսոյին և չտվեց հավելյալ 7 միավոր։

Բայց իսպանացու կարիերայում եղել են նաև հաջողակ պահեր. 2005 և 2006 թվականները չեմպիոնական էին Ալոնսոյի համար... Առանց հաջողության, նա դժվար թե հասներ այդ արդյունքին։ Օրինակ՝ 2005-ին նրա գլխավոր մրցակիցներ Կիմի Ռայկոնենի ու Միխայել Շումախերի բոլիդները անհուսալի էին. շատ էին խափանվում ու նրանց թողնում էին կես ճանապարհին։ Իսկ ահա 2006-ին Ֆեռնանդոն հաղթեց Շումախերին՝ նախավերջին Գրան պրիում գերմանացու բոլիդի խափանման արդյունքում։ Երբ 2 անգամ աշխարհի չեմպիոն ես դարձել, դժվար է համարվել ամենաանհաջողակ պիլոտ, բայց անհաջողակների շարքերում Ֆեռնանդո Ալոնսոյի ստվերը նշմարվում է...