MLS-ի կանոնավոր առաջնության հերթական խաղում «Օռլանդո Սիթիից» կրած պարտությունից (0-3) հետո «Ինտեր Մայամիի» առաջատար Լիոնել Մեսին դժգոհել է հանդիպման մրցավար Գվիդո Գոնսալեսից, գրում է Relevo-ն։
«Մրցակցի տարօրինակ խաղարկումից հետո դարպասապահը որսաց գնդակը, ասիստ կատարեց, ու գոլ խփեցին։ Մրցավարն ինձ ասաց, որ չգիտի կանոնը։ Իրականությունն այն է, որ երբեմն լինում են որոշակի սխալներ։ Սա արդարացում չէ, բայց, չգիտես ինչու, մրցավարները որոշակի խաղերում սխալներ են թույլ տալիս։ MLS-ն ավելի մանրամասն պետք է ուսումնասիրի տեղի ունեցողը։
Այժմ պետք է տեսնենք` մենք միասնակա՞ն ենք, թե՞ ոչ։ Երբ հաղթանակներ ես տանում, հեշտ է թվում, բայց երբ դժվար պահեր են լինում, ինչպես հիմա է, պետք է ավելի միասնական ու թիմային լինենք` կատարվածը հաղթահարելու համար»,- ասել է «Ոսկե գնդակի» 8-ակի դափնեկիրը։
«Ինտեր Մայամի» - «Օռլանդո» հանդիպման 43-րդ րոպեին հյուրերի դարպասապահ Պեդրո Գալեսյեն որսացել է իր խաղընկեր Իվան Անգուլոյից անդրադարձած գնդակն ու անմիջապես փոխանցել հարձակվող Լուիս Մուրելին։ Վերջինը գրավել էր մրցակցի դարպասն ու բացել հաշիվը։
Բոլոր մրցաշարերի վերջին 7 խաղերում «Ինտեր Մայամին» 5 պարտություն է կրել։ Ֆլորիդա նահանգը ներկայացնող ակումբը MLS-ի կանոնավոր առաջնության Արևելյան գոտում 13 խաղից հետո 22 միավոր է վաստակել ու 6-րդ տեղում է։
— _ (@21LBRB) May 19, 2025
