«Բարսելոնայի» նախագահ Ժոան Լապորտան The Guardian-ին տված հարցազրույցում պատմել է, որ ակումբի լեգենդ Լիոնել Մեսին 2006 թվականին մոտ է եղել «Ինտեր» տեղափոխությանը:
««Ինտերը» պատրաստ էր վճարել Մեսիի հրաժարագինը, որն այդ ժամանակ կազմում էր 150 միլիոն եվրո: Մենք արագ գործեցինք ու այդ գինը հասցրինք 250 միլիոնի:
Անկախ ամեն ինչից՝ ես հանգիստ էի, քանի որ լավ հարաբերություններ ունեի Լեոյի հոր՝ Խորխեի հետ: Մենք ասացինք, որ Մեսիին ձեռք բերելու միակ տարբերակը նրա հրաժարագինը վճարելն է, այլապես մենք չենք վաճառի նրա տրանսֆերային իրավունքը:
Ես Խորխեին ասացի, որ իր որդին մեր ակումբում երջանիկ է լինելու, դառնալու է լավագույն ֆուտբոլիստը պատմության մեջ, և մենք նրան օգնելու ենք այդ հարցում», - պատմել է Լապորտան, որի խոսքը մեջբերում է կատալոնական Sport-ը:
Այդ դեպքից 9 տարի առաջ «Ինտերը» «փախցրել» էր «Բարսելոնայի» մեկ այլ աստղի՝ Ռոնալդոյին՝ վճարելով բրազիլացու հրաժարագինը: Պատմությունն այս անգամ չկրկնվեց:
