Փարիզ, Մելյոն արվարձան, ալժիրյան արմատներով աստրոֆիզիկոս Յասին Հաջարի տան հեռուստացույցն աղմկում է բոլիդների ձայնից, Յասինի որդին՝ Իսակը դիտում է «Դիսնեյի» հայտնի «Մեքենաներ» մուլտֆիլմը...

Դպրոցում Իսակի սիրելի առարկան ֆիզիկան էր, Հաջարներն ազատ ժամանակ խոսում էին աստրոֆիզիկայի, բոլիդների կառուցվածքի մասին՝ դե իհարկե բաց չթողնելով ֆուտբոլային հանդիպումներն իրենց սիրելի թիմի՝ ՊՍԺ-ի մասնակցությամբ.

Կարտինգում կարիերայի ընթացքում Իսակի առաջին մեխանիկը հենց հայրն էր: Հաջարը գո-կարտ մրցաշարերում հաջողություններ գրանցելուց հետո տեղափոխվեց ֆրանսիական «Ֆորմուլա-4», հենց այնտեղ նրան նկատեցին «Ռեդ Բուլի» երիտասարդական ծրագրի սկաուտները.

Բելգիական «Սպա» մրցուղում հաղթանակն ու պատվո հարթակը Լեդենոնի Գրան պրիում ապացուցեցին, որ Հաջարն ունի արագություն ու մեծ պոտենցիալ: Դոկտոր Հելմուտ Մարկոն իհարկե նմանատիպ պոտենցիալը բաց թողնել չէր կարող:

Հաջարի հետ պայմանագիր ստորագրեցին և նրան նստեցրին «Հայտեկի» բոլիդի ղեկին՝ Ֆորմուլա 3-ին մասնակցելու համար: 18 մեկնարկ, 3 հաղթանակ, 5 պատվո հարթակ և 123 միավոր. Հաջարը դոկտոր Մարկոյին չհիասթափեցրեց ու արժանիորեն տեղափոխվեց Ֆորմուլա 2:

Մարկոյի ցանկությունն ալժիրյան արմատներով ֆրանսիացին իրագործեց արդեն Ֆորմուլա 2-ում: Չեմպիոնական պայքարը բրազիլացի Գաբրիել Բորտոլետոյի հետ ավելի քան էպիկ էր: «Կամպոսի» կազմում Հաջարը մոտ էր Ֆորմուլա 2-ի չեմպիոն դառնալուն, բայց ջիզեց Բորտոլետոյին 22 միավորով.

Աստրոֆիզիկոս Իսակը չդարձավ, բայց իր և հոր երազանքն իրագործեց՝ դառնալով ալժիրյան արմատներով առաջին պիլոտը, որը ելույթ է ունենում Ֆորմուլա 1-ում: Ընթացիկ մրցաշրջանի մեկնարկում Հաջարը պայմանագիր ստացավ «Ռեյսինգ Բուլսից»՝ դառնալով Յուկի Ցունոդայի թիմակիցը: Առաջին Գրան պրին ֆիասկոյի վերածվեց Հաջարի համար: Մելբուրնում Հաջարը վթարվեց մրցավազքի մեկնարկից առաջ, հուզված էր, իսկ նրան հուսադրում էր Լյուիս Հեմիլթոնի հայրը՝ Էնթոնին.

Էնթոնի Հեմիլթոնի խոսքերն իրապես օգնեցին Հաջարին, մյուս 8 Գրան պրիներն Իսակն անցկացրեց ավելի քան մարտունակ՝ 21 միավոր, 9-րդ հորիզոնական պիլոտների աղյուսակում և ֆենոմենալ պիլոտաժ լեգենդար Մոնակոյի մրցուղում:

Հաջարը նախ՝ որակավորվեց 6-րդ տեղում, հետո՝ Հեմիլթոնի տուգանքի արդյունքում բարձրացավ 5-րդ հորիզոնական, դե իսկ մրցավազքն ավարտեց նույն 6-րդ տեղում: Անսխալ պիլոտաժ և կարիերայի լավագույն արդյունք Մոնտե Կառլոյի Գրան պրիում:

Հաջարն արդեն հիմա «Ռեդ Բուլ» տեղափոխվելու գլխավոր թեկնածուներից է: Ֆրանսիացի տաղանդն ընդամենը 20 տարեկան է: Նմանատիպ ստաբիլությունն ու արդյունքները Հաջարի յուրահատկության վկայությունն են: Ֆրանսիացին ոչ հեռավոր ապագայում վստահաբար կարող է դառնալ Ֆորմուլա 1-ի գլխավոր դեմքերից մեկը: