Մարտի 18-ից եթերում կլինի Սոս Կարապետյանի նոր՝ «Լոս խնամախոս» 16 մասանոց ֆիլմը: Վերջին 4 տարում սա Սոսի նկարահանած 10-րդ ֆիլմն է: Ինչպես նախորդ ֆիլմերում, այնպես էլ «Լոս խնամախոս»-ում Սոսը կներկայանա և՛ որպես պրոդյուսեր, և՛ որպես գլխավոր դերակատար: «Իմ բոլոր ֆիլմերը կյանքից վերցված իրավիճակներ են: Դա սովորել եմ իմ ընկեր և մարզիչ Գոռ Վարդանյանից: ԱՄՆ տեղափոխվելուցս ի վեր հետևել եմ, թե ինչ մտածեալկերպ ունեն այստեղի հնաբնակներն ու նոր մեկնածները, այդ ամենը համեմել եմ գույներով և ստացել այս ֆիլմը: Մտքերս փոխանցել եմ Անի Մաղաքյանին: Նա էլ գրել է սցենարը», - Vnews culture-ի հետ զրույցում պատմել է դերասանը:
Ֆիլմը պատմում է Ամերիկայում և Հայաստանում ապրող 2 ընտանիքի մասին: Ամերիկաբնակ ընտանիքի հայրը (մարմնավորում է Սոս Կարապետյանը) հայ ավանդապաշտ մարդ է, որը չի համակերպվում ամերիկյան վարքուբարքին, օրենքներին: Ցանկանում է ամեն կերպ պահել հայկականը: Նա ունի մեկ տղա և մեկ աղջիկ: Աղջիկն ընկեր ունի, որն ապրում է Երևանում: Սիրելիի ձեռքը խնդրելու համար տղան ընտանիքով գնում է «Լոս խնամախոս»:
«Վերջին տարիներին հայ ազգը շատ դժվարությունների միջով անցավ: Ուզում եմ այս հումորային ֆիլմը ժպիտ պարգևի և գոնե մի քանի րոպեով կտրի հեռուստադիտողին առօրյա հոգսերից, - նշում է Սոսը: «Լոս խնամախոս»-ի դերասանական կազմում են Արմեն Մարգարյաը, Բեն Ավետիսյանը, Մովսես Երեմյանը, Գնել Ուլիխանյանը, Լիդա Առաքելյանը (Լիդուշիկ), Լաուրա Թորոսյանը, Նարեկ Մելիքյանը և այլք: Հեռուստատեսային երկար դադարից հետո ֆիլմում նկարահանվել է նաև Դավիթ Թադևոսյանը: Բեմադրող ռեժիսորը Հարութ Շատյանն է, կոմպոզիտորը՝ Արմեն Մարտիրոսյանը:
Սոսի խոսքով՝ Հայաստանում և ԱՄՆ-ում ֆիլմ նկարահանելն ամբողջությամբ այլ է՝ շատ ավելի բարդ: «Շատերը մտածում են, որ Միացյալ Նահանգներում ֆիլմ նկարահանելն ավելի հեշտ է, բայց իրականում հակառակն է: Երբ եկա ԱՄՆ, ընկերներիս ասացի, որ ուզում եմ ֆիլմեր նկարահանել: Ասացին՝ բացառված է, մտքիցդ հանի, ֆիլմ նկարահանելու համար շատ գումար է պետք: Ես չհանձնվեցի, փորձեցի և ստացվեց»: Մասշտաբային առումով «Լոս խնամախոս»-ը ևս բավառություն չէր: Ֆիլմի որոշ կադրեր նկարահանվել են Հավայան կղզիներում, Մայամիում, Լաս Վեգասում, Սան Դիեգոյում, Սան Ֆրանցիսկոյում և Սակրամենտոյում:
Այս պահին Սոսը ինչ-ինչ պատճառներով Հայաստան գալ չի կարող, սակայն հուսով է՝ այդ խնդիրը այս տարի կարգավորել: Եթե ստացվի, ապա դերասանը հաջորդ տարի կգա Հայաստան և ֆիլմ կնկարահանի արդեն իր հայրենիքում:
