ՖԻԴԵ-ն հրապարակել է շախմատիստների վարկանիշային հերթական աղյուսակը մարտի 1-ի դրությամբ:
Տղամարդկանց վարկանիշային աղյուսակը շարունակում է գլխավորել աշխարհի գործող չեմպիոն, նորվեգացի Մագնուս Կառլսենը (2852): Նա պահպանել է իր վարկանիշը:
Հայաստանը 100 ուժեղագույնների ցանկում ներկայացնում են 2 շախմատիստներ: Գաբրիել Սարգսյանը պահպանել է թե իր 2699 վարկանիշը, թե զբաղեցրած 41-րդ տեղը:
Հայկ Մարտիրոսյանն էլ պահպանել է իր վարկանիշը (2686), առաջադիմել մեկ աստիճան ու զբաղեցնում է 50-րդ տեղը:
Տղամարդկանց վարկանիշային աղյուսակում հայ շախմատիստներից երկուսը ներկայացնում են ԱՄՆ-ը: Լևոն Արոնյանը 9-ով ավելացրել է իր վարկանիշը (2745) և 17-րդ տեղից բարձրացել է 11-րդ: Սամուել Սևյանը պահպանել է իր 2687 վարկանիշը և 50-րդ հորիզոնականից բարձրացել է 48-րդ տեղ:
Կանանց վարկանիշային աղյուսակը գլխավորում է չինացի Հոու Յիֆանը՝ 2628: Նրա վարկանիշը 10-ով նվազել է:
100 ուժեղագույն շախմատիստուհիների ցանկում տեղ են զբաղեցրել Հայաստանի 3 ներկայացուցիչներ: Էլինա Դանիելյանի 2431 վարկանիշն անփոփոխ է մնացել, սակայն նա 35-րդ տեղից նահանջել է 40-րդ հորիզոնական: Լիլիթ Մկրտչյանը պահպանել է վարկանիշը (2379) և 68-րդ տեղը:
Վարկանիշը (2371) պահպանել է նաև Աննա Սարգսյանը, որը 73-րդ տեղից նահանջել է 74-րդ հորիզոնական:
Մինչև 20 տարեկան պատանիների վարկանիշային աղյուսակում Մամիկոն Ղարիբյանը 10-ով ավելացրել է վարկանիշը (2496) և 59-րդ տեղից բարձրացել է 55-րդ հորիզոնական:
Մարիամ Մկրտչյանը Հայաստանի միակ ներկայացուցիչն է մինչև 20 տարեկան աղջիկների վարկանիշային աղյուսակում: Նա պահպանել է վարկանիշը (2343) և բարձրացել 11-րդ տեղ:
