Երևանի Շառլ Ազնավուրի անվան հրապարակում բացվեց Հայաստանի ազգային հերոս, Ֆրանսիայի Պատվո լեգեոնի շքանշանակիր, աշխարհահռչակ շանսոնյե, բանաստեղծ, հասարակական գործիչ Շառլ Ազնավուրի արձանը՝ «Լա Բոհեմ» անվանումով: Միջոցառմանը ներկա են եղել ՀՀ ԿԳՄՍ նախարար Ժաննա Անդրեասյանը, Երևանի քաղաքապետ Տիգրան Ավինյանը, նախարարի տեղակալ Դանիել Դանիելյանը, Շառլ Ազնավուրի ընտանիքի անդամներ, ՀՀ-ում հավատարմագրված դեսպաններ, Փարիզի և Իլ դը Ֆրանս շրջանային խորհրդի պատվիրակներ, պետական կառույցների ներկայացուցիչներ, արվեստագետներ, մտավորականներ, Ազնավուրի արվեստի երկրպագուներ:
«Սիրով լցված է ցանկացած դրվագ, իրավիճակ, ստեղծագործություն, երաժշտություն և տող։ Մենք այդ սերը նյութականացնելու և մարմնավորելու ևս մի հնարավորություն ենք ստանում այստեղ՝ Ազնավուրի անունը կրող հրապարակում, որն առաջին հերթին մշակութային հրապարակ է՝ շրջապատված կինոթատրոնի, թատրոնի և Նկարիչների միության կառույցներով: Բնական է, որ այս հրապարակն Ազնավուրի անունով կոչելը և այստեղ Ազնավուրի արձանն ունենալը շատ ներդաշնակ են։ Ինչպես մշակույթն է միավորում մարդկանց, այդպես էլ Ազնավուրն իր գործունեությամբ շարունակում է միավորել մեզ, և սա թերևս ամենամեծ գնահատականն է», - հայտարարել է Ժաննա Անդրեասյանը։
Շառլ Ազնավուրի որդու՝ «Ազնավուր» հիմնադրամի համահիմնադիր Նիկոլա Ազնավուրի խոսքով՝ հայրը սիրահարված էր Հայաստանին, սիրում էր Հայաստանը կրքոտ ձևով, և դա արտահայտվում էր ոչ միայն բառերով, այլև գործունեությամբ: «Նա կրել է Հայաստանն իր սրտի ներքո և համաշխարհային բոլոր հարթակներում: Հայրս հավատում էր այս երկրի ուժին, հզորությանը, մշակույթին ու ապագային: Այդ իսկ պատճառով նա շատ խրախուսեց, որպեսզի իր ընտանիքը ժամանի և հաստատվի այստեղ՝ ապրեցնելով և իրականություն դարձնելով իր գաղափարները», - նշել է Նիկոլա Ազնավուրը և հավելել, որ արձանը պատկանում է հայ ժողովրդին և աշխարհի բոլոր այն մարդկանց, որոնք սիրում են Ազնավուրի արվեստը:
«Լա Բոհեմ» արձանի հեղինակը Դավիթ Մինասյանն է։ Մտահղացման հիմքում Ազնավուրի կերպարն է՝ հանդիսատեսի ծափահարությունների ուղեկցությամբ՝ «Լա Բոհեմ» երգի կատարման ընթացքում։ Արձանը պատրաստված է բրոնզից, օգտագործվել են նաև այլ նյութեր՝ մարմար, կարմիր էմալ: Չափսը՝ 3350x2500x1820 մմ, քաշը՝ 1850 կգ:
