Ո՞վ է 21-րդ դարում՝ 2001թ. հունվարի 1-ից մինչ օրս պաշտոնական մրցումներում խփած գոլերի քանակով հայկական ֆուտբոլի լավագույն ռմբարկուն: Կարծում եմ, որ ֆուտբոլասերներից շատերն առանց երկմտելու միանգամից կնշեն  Հենրիխ Մխիթարյանին: Եվ նրանք իրավացի կլինեն:

Անկախության շրջանի հայկական ֆուտբոլի աստղ Հենրիխ Մխիթարյանը, որը վերջերս նշեց ծննդյան 33-ամյակը, շարունակում է հաջող մրցելույթները «Ռոմայում»՝ աչքի ընկնելով արդյունավետ գործողություններով: Նրա համար հատկապես հաջող էր նախորդ մրցաշրջանը: Հենրիխը թիմի կազմում անցկացրած պաշտոնական 46 հանդիպումներում 15 գոլի հեղինակ դարձավ:

2006թ. պրոֆեսիոնալ ֆուտբոլում իր առաջին քայլերը «Փյունիկում» կատարած Մխիթարյանը 16 մրցաշրջանների ընթացքում պաշտոնական մրցումներում անցկացրած 718 հանդիպումներում 228 գոլի հեղինակ է դարձել: Անկախության շրջանի հայկական ֆուտբոլի լավագույն ռմբարկուի տիտղոսին արժանանալու համար Մխիթարյանին անհրաժեշտ է ընդամենը 9 գոլ խփել: Այդ դեպքում նա կգերազանցի Արսեն Ավետիսյանի արդյունավետության բացարձակ ռեկորդը: Ի դեպ, վերջինս իր գոլերի մեծամասնությունը խփել է 20-րդ դարում՝ ՀՀ առաջնություններում ՝ նորամուտը նշելով 1992թ:

2009թ. հուլիսից Մխիթարյանի ֆուտբոլային կարիերան շարունակվեց արտերկրում: Այդ պահին Մխիթարյանի հաշվին «Փյունիկում» անցկացրած պաշտոնական 93 հանդիպումներում ընդամենը 36 գոլ էր գրանցված, որից 30-ը նա խփել էր ՀՀ առաջնություններում, 6-ը՝ Հայաստանի գավաթի մրցաշարում:

Արտերկրի 6 ակումբներում անցկացրած պաշտոնական 516 հանդիպումներում Մխիթարյանը 151 անգամ խոցել է մրցակիցների դարպասները: Հիշեցնենք նաև, որ Հենրիխը Հայաստանի ազգային (32 գոլ) և երիտասարդական (9 գոլ) հավաքականների լավագույն ռմբարկուն է:

2-րդ ցուցանիշն ունի ՀՀ հավաքականի բրազիլացի նախկին կիսապաշտպան Մարկոս Պիզելին, որը ևս ֆուտբոլային իր ողջ կարիերան անցկացրել է 21-րդ դարում: Նրա հաշվին 157 գոլ է գրանցված: Այդ գոլերից 86-ը Մարկոսը խփել է «Արարատում» և «Փյունիկում»  անցկացրած պաշտոնական մրցումներում: Արտերկրի ակումբներում էլ բրազիլացի ֆուտբոլիստն իրեն վատ չի դրսևորել՝ դառնալով 60 գոլի հեղինակ: 11 գնդակ էլ Մարկոսը խփել է ՀՀ ազգային հավաքականում:

21-րդ դարի լավագույն ռմբարկուների եռյակը 125 գնդակով եզրափակում է Արամ Հակոբյանը: Ի տարբերություն Մխիթարյանի և Մարկոսի, Արամը ֆուտբոլային կարիերան սկսել է 20-րդ դարի վերջին՝ դառնալով 21 գոլի հեղինակ:

Բացի Արամից, 21-րդ դարի ամենաարդյունավետ 20 ֆուտբոլիստներից ևս 8-ը՝ Արա Հակոբյանը, Արման Քարամյանը, Արտյոմ Ադամյանը, Արամ Ոսկանյանը, Արթուր Քոչարյանը, Անդրանիկ Բարիկյանը, Նշան Էրզրումյանը և Գալուստ Պետրոսյանը գոլերի հաշիվը բացել են 20-րդ դարի վերջին:

21-րդ դարի հայկական ֆուտբոլի լավագույն ռմբարկուների ցանկի գործող 4 ֆուտբոլիստներից երկուսը՝ Գևորգ Ղազարյանն ու Ալեքսանդր Կարապետյանը ներկայումս հանդես են գալիս Հայաստանում: Ղազարյանը երկարատև ընդմիջումից հետո վերադառնալով հարազատ կոլեկտիվ, վնասվածքի պատճառով ընթացիկ առաջնությունում ընդամենը 4 խաղի է մասնակցել, սակայն հասցրել է 2 գոլ խփել:

Կարապետյանը 2-րդ մրցաշրջանն է անցկացնում Հայաստանում: Նա «Արարատ-Արմենիային» էր միացել նախորդ առաջնության գարնանային հատվածում՝ դառնալով 4 գոլի հեղինակ: Ընթացիկ առաջնության աշնանային հատվածում արդեն «Նոայի» կազմում Կարապետյանի հաշվին կրկին 4 գոլ է գրանցված: Կարապետյանը փոխել է ակումբային գրանցումը և պատրաստվում է նորամուտը նշել «Ալաշկերտում»: Տեսնենք, թե ինչպես կընթանան նրա գործերը նոր թիմում:

Տիգրան Բարսեղյանն էլ 2022թ. կսկսի իր համար նոր թիմում՝ Բրատիսլավայի «Սլովանում»: Ղազախական «Աստանայի» կազմում նախորդ մրցաշրջանում Տիգրանն աչքի ընկավ արդյունավետ գործողություններով՝ 35 հանդիպումներում խփելով 12 գոլ: Այդ ցուցանիշը 2-րդն է Բարսեղյանի ֆուտբոլային կարիերայում: Ավելի բարձր արդյունավետությամբ Բարսեղյանն աչքի է ընկել 2019թ. ղազախական մեկ այլ ակումբում՝ «Կայսարում», որի կազմում անցկացրած պաշտոնական 33 հանդիպումներում 14 գոլի հեղինակ է դարձել:

Տիգրան Բարսեղյանը ֆուտբոլային կարիերայում պաշտոնական մրցումներում արդեն 74 գոլի հեղինակ է դարձել՝ եզրափակելով 21-րդ դարի հայկական ֆուտբոլի 20 լավագույն ռմբարկուների ցանկը: Նա լավ հնարավորություն ունի ընդգրկվելու «100-ի» ակումբում, ինչը հաջողվել է 21-րդ դարի հայկական ֆուտբոլի լավագույն ռմբարկուներից 9-ին: Նրանցից վերջինը Գևորգ Ղազարյանն է, որը երանելի բարձունքը հաղթահարեց 2020թ. նոյեմբերի 15-ին Վրաստանի հավաքականի հետ կայացած Ազգերի լիգայի մրցախաղում:

VNews-ը ներկայացնում է 21-րդ դարի  հայկական ֆուտբոլի 20 լավագույն ռմբարկուների ցանկը: Հաշվի են առնված ՀՀ առաջնություններում (Ա), ՀՀ գավաթի մրցաշարերում (Գ), Հայաստանի Սուպերգավաթի հանդիպումներում (Ս), հայկական ակումբներում եվրագավաթների մրցաշարերում (Ե), ՀՀ ազգային (ԱՀ) և երիտասարդական (ԵՀ) հավաքականներում, «Համագործակցության գավաթի» խաղարկություններում (ԱՊՀ) և արտերկրի Բարձրագույն խմբի թիմերում (ԱԵ) պաշտոնական մրցումներում խփած գոլերը:

Ֆուտբոլիստներ	Ա	Գ	Ս	Ե	ԱՀ	ԵՀ	ԱՊՀ	ԱԵ	ԸՆԴ
1.Հենրիխ Մխիթարյան	30	6	-	-	32	9	-	151	228
2.Մարկոս Պիզելի	75	8	1	2	11	-	-	60	157
3.Արամ Հակոբյան	93	24	-	4	1	1	2	-	125
4.Յուրա Մովսիսյան	-	-	-	-	14	-	-	109	123
5.Արա Հակոբյան	83	6	-	-	7	3	2	21	122
6.Ալեքսանդր Կարապետյան	8	-	-	-	6	-	-	104	118
7.Գևորգ Ղազարյան	51	7	1	2	14	5	-	22	102
8.Արման Քարամյան	57	15	-	3	4	-	1	21	101
9.Արտյոմ Ադամյան	85	14	1	1	-	-	-	-	101
10.Արամ Ոսկանյան	32	11	1	2	-	-	-	50	96
11.Միհրան Մանասյան	82	11	1	1	-	-	-	-	95
12.Արթուր Քոչարյան	67	8	-	-	-	-	-	19	94
13.Էդգար Մանուչարյան	56	4	-	3	9	1	2	15	90
14.Սամվել Մելքոնյան	67	17	-	-	-	1	2	-	87
15.Լևոն Պաչաջյան	61	5	1	2	2	1	1	13	86
16.Նարեկ Բեգլարյան	62	16	-	1	-	-	1	2	82
17.Անդրանիկ Բարիկյան	72	9	-	-	-	-	-	-	81
18.Նշան Էրզրումյան	66	8	-	2	-	1	1	-	78
19.Գալուստ Պետրոսյան	48	5	-	-	1	-	-	21	75
20.Տիգրան Բարսեղյան	13	1	-	-	8	-	-	52	74