«ՓՅՈՒՆԻԿ» – «ԲԱՆԱՆՑ»
12 խաղ, +7=2-3, 16–9
20 սեպտեմբերի, ժ.18:00, «Հանրապետական» մարզադաշտ
1992թ., եզրափակիչ
28.05 ՀՄԸՄ – «Բանանց»՝ 0–2 (0–0)
Արա Նիգոյան (79), Աշոտ Ավետիսյան (87):
2002թ., 1/4 եզրափակիչ
19.04 «Բանանց» – «Փյունիկ»՝ 1-2 (0-1)
Գոռ Աթաբեկյան (13) – Մամադու Դիավարա (70, 75):
27.04 «Փյունիկ» – «Բանանց»՝ 2–0 (1–0)
Վարդան Մինասյան (32` 11մ), Արման Քարամյան (48):
2003թ., 1/2 եզրափակիչ
18.05 «Բանանց» – «Փյունիկ»՝ 1–1 (1–0)
Արարատ Առաքելյան (2) – Իսա Տրաորե (55):
23.05 «Փյունիկ» – «Բանանց»՝ 1–2 (1–0, լր. ժամ. 0–1)
Էդգար Մանուչարյան (17) – Արամ Հակոբյան (77), Արամ Սարգսյան (99):
2004թ., եզրափակիչ
09.05 «Փյունիկ» – «Բանանց»՝ 0–0, 6–5` 11մ
2006թ., 1/2 եզրափակիչ
19.04 «Փյունիկ» – «Բանանց»՝ 1–0 (1–0)
Աղվան Մկրտչյան (10):
26.04 «Բանանց» – «Փյունիկ»՝ 2–1 (2–0)
Արամ Հակոբյան (11, 32` 11մ) – Աղվան Մկրտչյան (83):
36-րդ րոպեին Աղվան Մկրտչյանը չիրացրեց 11մ հարվածը:
2009թ., եզրափակիչ
09.05 «Բանանց» – «Փյունիկ»՝ 0–1 (0–0)
Հենրիխ Մխիթարյան (90+2):
2010թ., եզրափակիչ
10.05. «Փյունիկ» – «Բանանց»՝ 4–0 (3–0)
Դավիթ Մանոյան (14), Մարկոս Պիզելի (41), Գևորգ Ղազարյան (45+3, 70):
2016/17թթ., 1/2 եզրափակիչ
11.04.2017 «Փյունիկ» – «Բանանց»՝ 2-1 (1-1)
Պետրոս Ավետիսյան (36), Արամ Բարեղամյան (52, ինքնագոլ) – Նենադ Ինյաց (28):
25.04.2017 «Բանանց» – «Փյունիկ»՝ 0-1 (0-0)
Արամ Շահնազարյան (50):
2-րդ տարին անընդմեջ «Փյունիկի» և «Բանանցի» գավաթային ճանապարհները կրկին հատվել են: Նախորդ խաղարկությունում մրցակիցների կիսաեզրափակիչ մրցավեճն ավարտվել էր «Փյունիկի» հաղթանակով, որը հետագայում եզրափակչում գավաթը զիջել էր «Շիրակին»՝ պարտվելով 0-3 խոշոր հաշվով:
Ընդամենը 5 օր առաջ մրցակիցներն իրենց հարաբերություններն էին պարզել առաջնության 6-րդ տուրի խաղում, որում «Բանանցը» 2-1 հաշվով հաղթանակ էր տոնել, իսկ «Փյունիկը» 3-րդ անընդմեջ պարտությունն էր կրել:
Մրցակիցների գավաթային հերթական դիմակայությունը 9-րդն է: Դրանցից միայն 2-ում է «Բանանցին» հաջողվել հաղթահարել «Փյունիկի» արգելքը:
Անշուշտ, մրցակիցների միջև կայացած գավաթային 12 հանդիպումներից առանձնանում են պատվավոր մրցանակի եզրափակիչները: «Փյունիկն» ու «Բանանցը» մինչ օրս 4 անգամ են միմյանց հետ վիճարկել Հայաստանի գավաթը:
1992թ. գավաթի անդրանիկ խաղարկությունում նորաստեղծ թիմերի մրցավեճում հաջողությունն ուղեկցեց Վարուժան Սուքիասյանի գլխավորությամբ հանդես եկող «Բանանցին», որը դարձավ Հայաստանի առաջին գավաթակիրը: «Փյունիկի» ղեկին, որն այն ժամանակ հանդես էր գալիս ՀՄԸՄ անվամբ, խաղացող-մարզչի կարգավիճակով Խորեն Հովհաննիսյանն էր:
12 տարի անց՝ 2004թ. «Փյունիկը» Միխայ Ստոյկիցայի գլխավորությամբ եզրափակչում ռևանշի հասավ «Բանանցի» նկատմամբ: Ճիշտ է, այս անգամ էլ փյունիկցիներին չհաջողվեց խոցել մրցակցի դարպասը՝ հաղթելով միայն հետխաղյա 11մ հարվածներով:
Թիմերի միջև կայացած գավաթի հաջորդ երկու եզրափակիչները տարբեր կերպ դասավորվեցին: 2009թ. եզրափակիչ խաղում գավաթի բախտը վճռեց ավելացված ժամանակի 2-րդ րոպեին Հենրիխ Մխիթարյանի խփած միակ գնդակը: Իսկ ահա հաջորդ տարի «Փյունիկը» եզրափակչում պարզապես ջախջախեց «Բանանցին»՝ 4 անպատասխան գնդակ ուղարկելով մրցակցի դարպասը:
Գրանցված խոշոր հաշիվն ինչ-որ չափով անսպասելի էր, քանի որ «Բանանցը» մակեդոնացի մարզիչ Ստևիցա Կուզմանոսկու գլխավորությամբ շատ հաջող էր մեկնարկել առաջնությունում՝ 7 տուրից հետո ընդամենը 3 միավորով հետ մնալով առաջատար «Փյունիկից», որի հետ մինչ գավաթի եզրափակիչն առաջնության հանդիպումն ավարտել էր ոչ-ոքի՝ 1-1:
«Փյունիկի» հետ գավաթային մրցավեճում վերջին անգամ «Բանանցին» հաջողությունն ուղեկցել է 2003թ. խաղարկության կիսաեզրափակչում (1-1, 2-1): Հովհաննես Զանազանյանի գլխավորությամբ «Բանանցը» մտավ եզրափակիչ, որտեղ 0-1 հաշվով զիջեց «Միկային»: Դրանից հետո մրցակիցների միջև կայացած գավաթային 5 դիմակայություններում էլ առավելության է հասել «Փյունիկը»:
Մրցակիցների գավաթային հանդիպումներում առավել արդյունավետ է գործել «Բանանցի» ներկայիս մարզիչ Արամ Հակոբյանը՝ խփելով 3 գնդակ: Փյունիկցիներից 2-ական անգամ գոլի հեղինակ են դարձել Մամադու Դիավարան, Աղվան Մկրտչյանը և Գևորգ Ղազարյանը:
Աշոտ Հայրապետյան
