Fastex Հայաստանի Պրեմիեր լիգայի 31-րդ առաջնության 26-րդ տուրից հետո չեմպիոնական մրցավազքում պայքարը զգալիորեն սրվեց: Առաջատար «Ուրարտուն» գարնանային հատվածում առաջին պարտությունը կրեց՝ սեփական դաշտում 1-3 հաշվով զիջելով «Փյունիկին», որը շարունակեց հաղթարշավը: «Արարատ-Արմենիան» հերթական հաղթանակը տոնեց և առաջատարից միավորների տարբերությունը հասցրեց 3-ի:
VNews-ը տուրի ամենաուշագրավ իրադարձությունները ներկայացնում է 10 փաստի տեսքով:
1. Տուրն անցավ հյուրերի առավելությամբ, որոնք տարան 3 հաղթանակ, մեկ խաղ ավարտեցին ոչ-ոքի, կրեցին մեկ պարտություն: Դաշտի տերերից հաղթեց միայն «Ալաշկերտը»: Առաջնությունում անցկացված 130 հանդիպումներից 49-ում հաղթել են դաշտի տերերը, 55-ում հաջողությունն ուղեկցել է հյուրերին, 26 խաղում էլ գրանցվել է ոչ-ոքի:
5 խաղում խփվեց 17 գոլ (միջինը մեկ խաղում՝ 3,4 գոլ): Առաջնությունում անցկացված 130 հանդիպումներում խփվել է 313 գոլ (միջինը մեկ խաղում՝ 2,4 գոլ):
2. «Փյունիկն» առաջնության գարնանային հատվածի 7-րդ խաղում էլ հաղթեց՝ ընդհատելով «Ուրարտուի» 7 անընդմեջ հաղթանակների շարքը: Առաջնության առաջատարը գարնանային հատվածում առաջին գոլերը բաց թողեց և առաջին անգամ խաղադաշտից պարտված հեռացավ: Նախորդ պարտությունը Դմիտրի Գունկոյի գլխավորած թիմը կրել էր անցյալ տարվա նոյեմբերի 30-ին՝ սեփական դաշտում 3 անպատասխան գնդակ ընդունելով «Արարատ-Արմենիայից»:
«Ուրարտուն» միակ թիմն էր, որի հետ ընթացիկ առաջնության հանդիպումներում «Փյունիկը» դեռ միավոր չէր վաստակել: Մրցակիցների միջև կայացած առաջնության նախորդ 3 խաղերից 2-ում հաղթել էր «Ուրարտուն», մեկում գրանցվել էր ոչ-ոքի:
3. «Լեռնային Արցախը» 9-րդ անընդմեջ պարտությունը կրեց: Առաջնության վերջին 13 հանդիպումներում «Լեռնային Արցախը» հաղթանակ չի տարել՝ վաստակելով ընդամենը 3 միավոր: Առաջնությունում վերջին հաղթանակն արցախցիները տարել են անցյալ տարվա հոկտեմբերի 24-ին՝ նվազագույն հաշվով առավելության հասնելով ԲԿՄԱ-ի նկատմամբ:
Արդեն 5 խաղ՝ 488 րոպե շարունակ արցախցիները չեն գտել մրցակիցների դարպասի բանալին: Վերջին գոլն առաջնությունում «Լեռնային Արցախի» օգտին գրանցվել է փետրվարի 28-ին «Ալաշկերտի» հետ կայացած հանդիպման 52-րդ րոպեին: Գոլի հեղինակ է դարձել Օլաոլուվա Օջետունդեն:
Առաջնության 5-րդ անընդմեջ խաղում «Լեռնային Արցախը» պատժվեց 11մ հարվածով: Այդ հանդիպումներում թիմի դարպասին 11մ 7 հարված է նշանակվել, որից իրացվել է 6-ը, իսկ բանակային Գրենիկ Պետրոսյանի հարվածից հետո գնդակը հետ է մղվել դարպասաձողից: Ընդ որում ԲԿՄԱ-ի և «Փյունիկի» հետ խաղերում «Լեռնային Արցախի» դարպասին 2-ական 11մ հարված է նշանակվել:
Ընդհանուր առմամբ ընթացիկ առաջնությունում «Լեռնային Արցախի» դարպասին 11մ 10 հարված է նշանակվել, որից իրացվել է 7-ը: Վյաչեսլավ Գրիգորյանին հաջողվել է հետ մղել «Նոայի» ֆուտբոլիստներ Դրամանե Սալուի և Գուդնյուզ Իգբոկվեի հարվածները:
4. Առաջնության գարնանային հատվածում արդյունավետությամբ աչքի ընկնող Յուսուֆ Օտուբանջոն 12 գնդակով գլխավորեց լավագույն ռմբարկուների ցանկը: Գոլերից 8-ը նիգերիացի հարձակվողը խփել է գարնանային հատվածի 7 հանդիպումներում: Այդ ընթացքում միայն «Նոային» է հաջողվել անառիկ պահել դարպասն Օտուբանջոյի հարվածներից:
5. Տուրն առատ էր 11մ հարվածներով: Նշանակված 4 հարվածներն էլ հաջող իրացրին ալաշկերտցի Արտակ Եդիգարյանը, «Արարատ-Արմենիայի» լեգեոնական Ալեմաոն, շիրակցի Մուսա Փոլ Բակայոկոն և «Ուրարտուի» պաշտպան Արման Ղազարյանը: Վերջինս ոչ միայն բացեց գոլերի հաշիվը Fastex ՀՊԼ-ում, այլև դարձավ «Փյունիկի» հետ հանդիպումներում «Ուրարտուի» խփած հոբելյանական՝ 100-րդ գոլի հեղինակը:
Արտակ Եդիգարյանն ընթացիկ առաջնությունում հաջող է իրացրել 11մ բոլոր 5 հարվածներն էլ: Fastex ՀՊԼ-ում խփած գոլերի ընդհանուր քանակով (58) Եդիգարյանն ընթացիկ առաջնության մասնակիցներից ամենաարդյունավետն է: 33-ամյա ֆուտբոլիստը Հայաստանի առաջնությունների 100 լավագույն ռմբարկուների ցանկում Սևադա Արզումանյանի հետ բաժանում է 36-37-րդ տեղերը:
6. Բացի Արման Ղազարյանից, Fastex ՀՊԼ-ում գոլերի հաշիվը բացեցին նաև «Վանի» արգենտինացի ֆուտբոլիստ Մանուել Մորելյոն, ալաշկերտցի Վիտալի Ուստինովը, փյունիկցի Ալեքսանդր Միլկովիչը և «Նոայի» կորեացի ֆուտբոլիստ Յեոնսեունգ Կիմը:
Մորելյոն դարձավ ընթացիկ առաջնությունում գրանցված հոբելյանական՝ 300-րդ գոլի հեղինակը: Նա ընդգրկվեց «Վանի» կազմում Fastex ՀՊԼ-ում գոլ խփած ամենատարեց ֆուտբոլիստների տասնյակում՝ «Ալաշկերտի» դարպասը գրավելով 28 տարեկան 171 օրականում:
Փյունիկցի Ալեքսանդր Միլկովիչը (33 տարեկան 44 օրական) և ալաշկերտցի Վիտալի Ուստինովն (31 տարեկան 341 օրական) ընդգրվեցին Fastex ՀՊԼ-ում իրենց թիմերում գոլ խփած ամենատարեց լեգեոնականների տասնյակում:
7. «Շիրակի» պաշտպան Մարկո Պրլևիչը հայկական ակումբներում պաշտոնական մրցումներում 159-րդ խաղն անցկացրեց և ընդգրկվեց Հայաստանի առաջնությունների ամենափորձառու լեգեոնականների տասնյակում: Սերբ ֆուտբոլիստը ցանկից դուրս թողեց Անատոլի Այվազովին, որը 158 խաղ է անցկացրել: Ռեկորդակիրը «Միկայի» բրազիլացի նախկին պաշտպան Ալեքս Էնրիկե դա Սիլվան է, որը մասնակցել է պաշտոնական 291 խաղի: Իսկ ընթացիկ առաջնության մասնակից լեգեոնականներից լավագույն արդյունքն ունի Վբեյմար Անգուլոն՝ 208 խաղ:
8. Այս տուրում 3 ֆուտբոլիստներ նշանակալի հոբելյաններ նշեցին: Կարեն Մուրադյանը Fastex ՀՊԼ-ում հոբելյանական՝ 250-րդ խաղն անցկացրեց: Նա խաղացել է հայկական 4 ակումբներում, իսկ առավել շատ հանդիպումների (138) մասնակցել է «Շիրակում», որտեղ սկսել էր ֆուտբոլային կարիերան:
«Լեռնային Արցախի» նորեկ Ալիկ Առաքելյանը ֆուտբոլային կարիերայում 300-րդ պաշտոնական խաղն անցկացրեց: «Վանի» կիսապաշտպան Ռումյան Հովսեփյանն էլ հայկական ակումբներում, Հայաստանի ազգային և երիտասարդական հավաքականներում պաշտոնական մրցումներում 300-րդ խաղի հոբելյանը նշեց:
9. Արսեն Բեգլարյանի 5 անառիկ խաղերի շարքն ընդհատվեց: Մինչև Միլկովիչի խփած գոլն, «Ուրարտուի» դարպասապահը 561 րոպե շարունակ դարպասն անառիկ էր պահել: Վերջին գոլն առաջնությունում Բեգլարյանը բաց էր թողել անցյալ տարվա սեպտեմբերի 10-ին «Ալաշկերտի» հետ կայացած խաղի 16-րդ րոպեին Տիագո Գալվաոյի հարվածից հետո: Այդ խաղից հետո նա մինչև առաջնության գարնանային հատվածի մեկնարկն այլևս խաղադաշտ դուրս չէր եկել:
10. Տուրում գրանցվեց 2 ինքնագոլ, որոնց հեղինակներն էին Արթուր Քարտաշյանն («Վան») ու Երջանիկ Ղուբասարյանը («Նոա»): Ընթացիկ առաջնությունում արդեն 10 ինքնագոլ է գրանցվել: Սեփական դարպասը գրավել են նաև ալաշկերտցիներ Դիդիե Բորիս Կադիոն և Վիտալի Ուստինովը, շիրակցի Ալեքսա Վիդիչը, «Վանի» պաշտպան Համլետ Ասոյանը, փյունիկցի Միխայիլ Կովալենկոն, «Ուրարտուի» ավագ Ժիրայր Մարգարյանն ու արարատցի Հաջի Մուստաֆան: Ընդ որում Մարգարյանը «Լեռնային Արցախի» հետ խաղում 2 անգամ է գրավել սեփական դարպասը՝ դառնալով յուրօրինակ հակառեկորդի հեղինակ:
