2018թ․ Եվրոպայի չեմպիոն Ֆերդինանդ Կարապետյանն անհաջող ելույթ է ունեցել մայիսի 7-14-ը Քաթարի մայրաքաղաք Դոհայում կայացած ձյուդոյի աշխարհի առաջնությունում։ Հայաստանի միակ ներկայացուցիչը, մինչև 73 կգ քաշային կարգի առաջին իսկ գոտեմարտում պարտվելով ալժիրցի Ռեդուան Մեսաուդ Դրիսին, դուրս է մնացել հետագա պայքարից։ Հայաստանի հավաքականի գլխավոր մարզիչ Հովհաննես Դավթյանը VNews-ի թղթակցի հետ զրույցում հայտնեց, որ չնայած բոլոր ջանքերին՝ Կարապետյանին այդպես էլ չէր հաջողվել լավագույնս պատրաստվել այս կարևոր մրցմանը։
«Մարզումների ընթացքում փորձել էինք հնարավորինս լավ մարզավիճակի հասցնել Ֆերդինանդին, սակայն նա այդպես էլ չկարողացավ հավուր պատշաճի ներկայանալ աշխարհի առաջնությանը։ Դժվար է բնականոն հուն վերադառնալ այն վնասվածքներից և անձնական խնդիրներից հետո, որոնց նա բախվել էր վերջին մեկ տարում։ Բացի այդ, աշխարհի առաջնությունն այս տարի սովորականից շուտ անցկացվեց և ստիպված էինք նախապատրաստական փուլը կազմակերպել այնպես, որպեսզի կարճ ժամանակում առավելագույն արդյունավետություն ապահովեինք։ Սակայն, զգացվեց, որ Կարապետյանը լավ մարզավիճակում չէր։ Կփորձենք հնարավորինս լավ պատրաստվել նոյեմբերին նախատեսված Եվրոպայի առաջնությանը»,- նշեց Հովհաննես Դավթյանը։
Մարզիչն այսպես մեկնաբանեց Կարապետյանի պարտությունը ալժիրցի ձյուդոիստից. «Ֆերդինանդի հետ քննարկել և վերլուծել ենք այդ գոտեմարտը։ Եկանք այն եզրակացության, որ զգացվեց տևական հարկադիր պարապուրդը։ Գոտեմարտը պարզապես չստացվեց։ Այլ պատճառ դժվարանում եմ նշել, որովհետև ֆիզիկական, տեխնիկական և տակտիկական պատրաստականությամբ Կարապետյանը չզիջեց մրցակցին»։
Հավաքականի գլխավոր մարզիչն ընդգծեց, որ Ֆերդինանդ Կարապետյանը միջազգային մրցագորգ կվերադառնա միայն նորմալ մարզավիճակում լինելու դեպքում։
«Առաջիկայում «Գրան պրի» շարքի մրցում ունենք Ավստրիայում, բայց որոշեցինք բաց թողնել այն։ Պայմանավորվեցինք, որ նա միջազգային մրցաշարերի կմասնակցի միայն համապատասխան պատրաստականությամբ։ Վերջիվերջո, մեր նպատակն է ձեռք բերել մեդալներ և օլիմպիական վարկանիշ։ Աշխարհի առաջնությունը ցույց տվեց, որ շատ անելիք ունենք։ Նման բարդ քաշային կարգում, որում լուրջ մարզիկների պակաս չկա, շատ դժվար է պայքարել առանց լիարժեք պատրաստվածության։ Հավաքների ընթացքում փորձելու ենք շտկել առկա թերությունները և ստանալ ցանկալի պատկեր»,- նշեց մեր զրուցակիցը։
Ըստ մարզչի՝ Կարապետյանն առաջիկայում մարզվելու է Ռուսաստանի Վլադիկավկազ քաղաքում, սակայն պարբերաբար ներգրավվելու է նաև Հայաստանի հավաքականի ուսումնամարզական հավաքներին, որոնք նախատեսվում է անցկացնել Վրաստանում, Իսպանիայում և Վլադիկավկազում։ Այդ ընթացքում՝ հունիսի 22-26-ը, հավաքականի մյուս ձյուդոիստ Արտյոմ Ղալաչյանը միջազգային մրցաշարի է մասնակցելու Ռուսաստանում։
