Ապրիլի 6-ին  Հակոբ Պարոնյանի անվան երաժշտական կոմեդիայի պետական թատրոնում տեղի ունեցավ  «Փրայմ Թայմ» մյուզիքլի առաջնախաղը։ Ներկայացման գաղափարը մշակութային գործիչ, թատերագետ, Մոսկվայի մյուզիքլի թատրոնի գեղարվեստական ղեկավար Միխայիլ Շվիդկոյինն է։ «Փրայմ Թայմը» միջազգային ստեղծագործական գործակցության եզակի օրինակ է:  Նախագիծը վերածվել է լայնածավալ մշակութային գործակցության՝ համախմբելով 5  երկրի արվեստագետների։ Մյուզիքլի սցենարը նորարարական և ինքնատիպ է՝ հատուկ մշակված տվյալ բեմադրության համար։ Բնօրինակ երաժշտությունը հեղինակել է կանադացի կոմպոզիտոր Մաքսիմ Լեպաժը։ Ներկայացումը ուղեկցվում է կենդանի նվագակցությամբ՝ դիրիժոր Կարեն Լավչյան։ Նկարչական ձևավորումն  իրականացրել է Վրաստանի Շոթա Ռուսթավելու անվան ազգային թատրոնի բեմանկարիչ Աննա Նինուան, զգեստների ձևավորումը՝ մոլդովացի դիզայներ Տատյանա Պոպեսկուն։  Բալետմեյստերը Արինա Արարատյանն է, խմբավարը՝ Շուշան Հովհաննիսյանը։ Ներգրավված մասնագետները միջազգային փորձառու արվեստագետներ են, ովքեր համադրել են ժամանակակից թատերական միտումները տեղական մշակութային առանձնահատկությունների հետ։
«Fast News Culture»-ը ներկա է եղել «Փրայմ Թայմ» մյուզիքլի պրեմիերային և առանձնացրել ամենակարևորը։

Մյուզիքլը բացահայտում է հեռուստատեսության հակառակ կողմը, շոու բիզնեսի կուլիսները։ Այն դասական թվացող պատմություն է Մոխրոտի մասին։ Մարզից մի աղջիկ գալիս է հեռուստատեսային երաժշտական ​​մրցույթի՝ մայրաքաղաքը գրավելու նպատակով: Չնայած դժվարություններին՝ նա փորձում է ազնվորեն անցնել բոլոր փորձությունները, հասնել հաջողության և չկորցնել իր տեսակն այդ մեծ քաղաքում՝ Երևանում։ Մյուզիքլի գլխավոր հերոսուհին Թերեզա Մաթևոսյանն է։ Խաղում են նաև Մարիամ Գրիգորյանը, Արսեն Գևորգյանը, Աննա Մովսեսյանը, Ալբերտ Ղազարյանը, Գևորգ Դավթյանը, Հայկ Մաթևոսյանը, Յանա Թևանյանը, Հովսեփ Նշանյանը, Տիգրան Նահապետյանը և Անգելինա Անտարյանը։ «Նախորդ տարի ամռանը հանդիպեցինք Միխայիլ Շվիդկոյին։ Նա ուզում էր, որ Մոսկվայի մյուզիքլի և Հակոբ Պարոնյանի անվան երաժշտական կոմեդիայի պետական թատրոնները համատեղ ստեղծեն ներկայացում, որը կդառնա միջազգային նախագիծ։ Մոսկվայի մյուզիքլի թատրոնի հետ ստորագրեցինք հուշագիր։ Մյուզիքլի բոլոր բացառիկ իրավունքները տրամադրեցին մեզ։ Այդ գաղափարի շուրջ Հակոբ Ղազանչյանի գլխավորությամբ կազմեցինք հեղինակային խումբ, որն էլ ստեղծեց այս մյուզիքլը», - պատմեց Հակոբ Պարոնյանի անվան երաժշտական կոմեդիայի պետական թատրոնի տնօրեն Կարո Շահբազյանը։

Հատուկ «Փրայմ Թայմի» պրեմիերայի համար Երևանում էր Մոսկվայի մյուզիքլի թատրոնի գեղարվեստական ղեկավար, մյուզիքլի մտահղացման հեղինակ Միխայիլ Շվիդկոյը։ «1967 թվականից աշխատում եմ հեռուստատեսությունում, 1966-ից՝ թատրոնում։ 2 հաջող ներկայացում բեմադրեցինք, որոնք մինչև օրս ներառված են Մոսկվայի երաժշտական ​​թատրոնի խաղացանկում։ Առաջինը «Կրկեսի արքայադուստրն» էր, որն իրականացրինք մեր կանադացի ընկերների հետ։ Հաջորդեց Անդրեյ Կոնչալովսկու բեմադրած «Ոճիր և պատիժը»։ Այդ ժամանակ հասկացա, որ մեզ ժամանակակից պատմություն է պետք։ Անընդհատ հիշում էի Վլադիմիր Նեմիրովիչ-Դանչենկոյի նամակը Չեխովին։ Նա գրել էր, որ թատրոնը նոր պիեսներ բեմադրելու համար է և Չեխովից նոր գործեր էր ուզել։ Եվ ինձ մոտ ծագեց այս մյուզիքլի գաղափարը։ Պրեմիերան 2020 թվականին էր», - ներկայացրեց Շվիդկոյը։

Հ. Պարոնյանի անվան թատրոնի գլխավոր ռեժիսոր Հակոբ Ղազանչյանն անկեղծացավ՝ ի սկզբանե Միխայիլ Շվիդկոյի հետ որոշել էին Հայաստան բերել Դոն Կիխոտը։ Հետո հասկացան, որ դա բեմադրելու համար պետք է սպասեն 3 տարի, քանի որ որոշել էին գրել նոր լիբրետո և երաժշտություն։ Ուզում էին ամեն ինչ անել զրոյից։ «Հետո պարոն Շվիդկոյն առաջարկեց այս մյուզիքլը։ Ասաց, որ սյուժեն հետաքրքիր կլինի նաև Հայաստանում։ Ցուցադրեց իրենց բեմադրության հոլովակը, որպեսզի լսեմ երաժշտությունն ու հասկանամ՝ ինչի մասին է խոսքը։ Նայեցի ու ասացի՝ այո, սա ենք անում։ Լիբրետոն թարգմանեցինք և տեղայնացրինք։ Գործողությունը կատարվում է Հայաստանում։ Կերպարները ևս հայեր են։ Բավական աշխատատար էր, որովհետև երգերը պետք է ճիշտ թարգմանվեին և համապատասխանեին երաժշտությանը։ Այս մյուզիքլի վրա աշխատեցինք 4-5 ամիս։ Ամեն ինչ արեցինք բացառապես թատրոնի ուժերով։ Ունենք հրաշալի երգչախումբ, բալետային խումբ, մենակատարներ և նվագախումբ։ Մյուզիքլը նայելուց հետո կհամոզվեք։ Բոլոր դերասանների համար զգեստ ենք կարել։ Որոշ դեպքերում ասում էի՝ ոչինչ, մյուս զգեստը կամ կոշիկը կօգտագործենք, թատրոնի տնօրենը չէր թողնում։ Ասում էր՝ ինչ է պետք, ասեք, որ նորը գնենք։ Նախապատրաստական փուլում բարդություններ չեն եղել։ Եթե նույնիսկ եղել են, դրանք մեր մասնագիտության մի մասն են», - նշեց մյուզիքլի ռեժիսորը։

ԿԳՄՍ նախարարի տեղակալ Դանիել Դանիելյանն էլ խոստովանեց՝ սա այն նախագծերից է, որոնց մասին կարելի է երազել։ «5 երկիր է ընդգրկված այս մյուզիքլում։ Արվեստը հենց այդ մասին է։ Այն սահմաններ չի ճանաչում։ Այսպիսի նախագծերով մենք ոչ միայն Հայաստան ենք բերում հետաքրքիր մտքեր և վերարտադրում մեր ստեղծագործական ներուժը, այլև հայկական արվեստը հանրահռչակում ենք Հայաստանից դուրս։ Հայաստանում վաղուց չէր եղել նման մեծամասշտաբ նախագիծ։ Այս մյուզիքլի Պարոնյանի թատրոնին տալիս է նոր շունչ և ստեղծագործական ուղի։ Կարծում եմ՝ սա կլինի շարունակական, և մենք կզարգացնենք մյուզիքլի ժանրը Հայաստանում», - ընդգծեց Դանիելյանը։ 

Թատրոնների ստորագրած հուշագիրը հիմք է հետագա գործակցության խորացման և նոր համատեղ նախագծերի իրականացման համար՝ ներառյալ ստեղծագործական փոխանակումներ, համատեղ հյուրախաղեր և փորձի փոխանակման ծրագրեր։