Հայաստանի չեմպիոն Երևանի «Փյունիկի» գլխավոր մարզիչ Եղիշե Մելիքյանը մամուլի ասուլիսում խոսել է Մինսկի «Դինամոյի» (Բելառուս) դեմ Չեմպիոնների լիգայի որակավորման առաջին փուլի առաջին հանդիպման մասին։
«Ուսումնասիրել, ինչպես նաև լսել ենք մրցակցին։ Տեսել ենք «Դինամոյի» մարզչի հարցազրույցը։ Գիտենք, որ մեր դեմ պրեսինգով են խաղալու։ Մենք պատրաստ ենք. լրջորեն պատրաստվել ենք հանդիպմանը»,- ասել է մարզիչը։
«Դինամո» - «Փյունիկ» դիմակայության առաջին հանդիպումը կայանալու է հուլիսի 10-ին Հունգարիայի Մեզեկեվեշդ քաղաքում` Երևանի ժամանակով 22:45-ից սկսած։ Բելառուսական ակումբները եվրագավաթային հանդիպումներն անցկացնում են չեզոք խաղադաշտում։
Բելառուսի չեմպիոնի արգելքը հաղթահարելու դեպքում Եղիշե Մելիքյանի գլխավորած թիմը որակավորման երկրորդ փուլում կմրցի «Լուդոգորեց» (Բուլղարիա) - «Դինամո Բաթումի» (Վրաստան) զույգի հաղթողի դեմ: «Փյունիկի» ու «Դինամոյի» դիմակայության պարտվողը պայքարը կշարունակի Կոնֆերենցիաների լիգայի որակավորման երկրորդ փուլում և կմրցի «Սլովան» (Սլովակիա) - «Ստրուգա» (Հյուսիսային Մակեդոնիա) զույգի պարտվողի դեմ:
«Փյունիկը» նույն խնդրով է գնում Եվրոպա․ Մելիքյանը կօգտագործի իր ամենաուժեղ կողմը
