Սերբիայի Վրնյաչկա Բանյա քաղաքում ընթացող շախմատի Եվրոպայի անհատական առաջնության 3-րդ տուրում առաջատարների խմբում գտնվող հայաստանցի երեք շախմատիստներն էլ առաջին միավորները կորցրին:

Գաբրիել Սարգսյանը սևերով 54-րդ քայլին հաշտություն կնքեց ռուսաստանցի Դավիթ Պառավյանի հետ: Մամիկոն Ղարիբյանն էլ սևերով 30-րդ քայլին ոչ-ոքի խաղաց ռուսաստանցի Վլադիսլավ Կովալյովի հետ:

Իսկ ահա Շանթ Սարգսյանը սպիտակներով պարտվեց հույն Ստամատիս Կուրկուլոս-Արդիտիսին: Առաջին պարտությունները կրեցին նաև Արմեն Բարսեղյանն ու Վահե Դանիելյանը, որոնց մրցակիցներն էին համապատասխանաբար իսրայելցի Ավիտալ Բորուչովսկին և Սլեվենիայի ներկայացուցիչ Յան Սուբելջը:

3 տուրից հետո Գաբրիել Սարգսյանն ու Մամիկոն Ղարիբյանը վաստակել են 2,5-ական միավոր: Նրանց միավորներով հավասարվեցին Հայկ Մարտիրոսյանը, Էմին Օհանյանը և Հայաստանի գործող չեմպիոն Սամվել Տեր-Սահակյանը:

Մարտիրոսյանը սկզբունքային մրցախաղում սպիտակներով հաղթեց ադրբեջանցի Ահմադ Ահմադզադային: Օհանյանը սպիտակներով պարտության մատնեց հույն Անդրեաս Կելիրեսին, իսկ Տեր-Սահակյանը կրկին սպիտակներով առավելության հասավ ֆրանսիացի Քվենտին Լոզայի նկատմամբ: Հայ շախմատիստների հնգյակը 11 առաջատարներին հետապնդողների խմբում է:

Ռոբերտ Հովհաննիսյանը, Մանուել Պետրոսյանը, Սարգիս Մանուկյանը, Ռոբերտ Փիլիպոսյանն ու Ալեքս Սահակյանը մրցակիցների հետ հաշտություն կնքեցին:

Մարտի 6-ին կկայանա Եվրոպայի առաջնության 4-րդ տուրը: