Ճանաչված դերասան, պրոդյուսեր և հասարակական գործիչ Ջորջ Թիմոթի Քլունին այսօր նշում է ծննդյան 61-ամյակը:

Այդ առթիվ VNews-ը ներկայացնում է 10 փաստ հայերի մեծ բարեկամի մասին։

1․ Ջորջ Քլունին Միացյալ Նահանգների նախագահ Աբրահամ Լինքոլնի հետնորդն է։ 

2․ Քլունիի մայրը՝ Նինա Բրյուսը, գեղեցկության նախկին թագուհի է, իսկ հայրը՝ Նիքը, լրագրող և քաղաքագետ Կենտուկիից, Քլունին մեծացել է իռլանդական կաթոլիկ ընտանիքում։

3․ Միջնակարգ դպրոցում Քլունին Բելլի կաթված է ստացել՝ գենետիկ հիվանդություն, որը փոխանցվել է նրան հորից։ Գրեթե մեկ տարի նրա դեմքի կեսը կաթվածահարված էր, ձախ աչքը` փակ, չէր կարողանում նորմալ ուտել և խմել, ինչի պատճառով ստանում է «Ֆրանկենշթեյն» մականունը։ 

4․ Առաջին անգամ տեսախցիկի առջև փոքրիկ Ջորջը հայտնվել է հինգ տարեկանում՝ հոր շոուի ժամանակ։

5․ Հոլիվուդ տեղափոխվելու գումարը Ջորջը վաստակել է՝ աշխատելով ապահովագրական գործակալ և անգամ կանացի կոշիկ վաճառող։

6․ Հանրահայտ է դարձել «Շտապ օգնություն» հեռուստասերիալից և «Մայրամուտից մինչև լուսաբաց» կինոֆիլմից հետո։ Արժանացել է «Օսկարի»` որպես «Երկրորդ պլանի լավագույն տղամարդ դերասան» «Սիրիանա» ֆիլմում դերի համար, «Ոսկե գլոբուսի»` «Հետնորդներ» ֆիլմում (2011 թ.) միլիոնատեր Մեթ Քինգի դերի և «Օ՜, որտե՞ղ ես դու, եղբա՛յր» ֆիլմում (2000 թ.)՝ փախչող դատապարտյալի դերի համար։ Երկրորդ անգամ արժանացել է «Օսկար» մրցանակի որպես պրոդյուսեր «Օպերացիա «Արգո»» ֆիլմի համար։ Հենց այդ ֆիլմի համար էլ արժանացել է չորրորդ «Ոսկե գլոբուս» մրցանակի և առաջին BAFTA արձանիկի։

7․ Նա զբաղվում է հումանիտար գործունեությամբ, որում ընդգրկված են Դարֆուրի հակամարտության կարգավորումը, Հայոց ցեղասպանության ճանաչումը, Հայիթիի երկրաշարժից տուժածների օգնությանն ուղղված աշխատանքները։

8․ Ջորջ Քլունին  2016 թվականին եկել է Հայաստան և ապրիլի 24-ին մասնակցել «Ավրորա» մրցանակի հանձնման արարողությանը: 
«Ես ցանկանում եմ առնչություն ունենալ «100 կյանք» նախագծին, քանի որ այն և մեր Not On Our Watch հիմնադրամն ունեն նույն առաքելությունը, այն է` համաշխարհային ուշադրություն հրավիրել ցեղասպանությունների բացասական հետևանքների վրա»,- ասել է Քլունին։

«Հիտլերն ասել էր` ո՞վ է հիշում այսօր հայերին, ահա՛ և պատասխանը՝ ամբողջ աշխարհը։ Հիմա պատմությունը փոխվել է, և թուրքերն այլեւս չեն ուզում խոսել ցեղասպանության մասին:  Եվ, քանի որ մենք Թուրքիայում ռազմական բազաներ ունենք, հանկարծ այդ նույն քաղաքական գործիչները, որոնք մինչ այդ ասում էին՝ «Այո, եղել է ցեղասպանություն», այսօր չեն կարող խոսել դրա մասին: Դուք դա չեք կարող ցեղասպանություն կոչել»։

9. 2019 թվականի մարտի 28-ին Քլունին բաց նամակ է գրել՝ կոչ անելով բոյկոտել Բրունեյի սուլթանին պատկանող հյուրանոցները՝ երկրում միասեռական կապերի համար մահապատժի սահմանման պատճառով։ Քլունին թվարկել է ինը հյուրանոց և խնդրել ընթերցողներին մտածել, թե ինչպես ենք «մենք փող դնում այն ​​մարդկանց գրպանները, որոնք որոշում են քարեր նետել և ծեծել իրենց քաղաքացիներին իրենց նույնասեռականության համար»: 2019 թվականի մայիսի 5-ին Բրունեյի իշխանությունները չեղարկել են որոշումը։

10․ «Ես սիրում եմ իմ աշխատանքն ու այն ճանաչումը, որն ունեմ։ Խլեք այն ինձնից, և ես, հավանաբար, կմեռնեմ»։