Ձյուդոյի Հայաստանի ազգային հավաքականի գլխավոր մարզիչ Հովհաննես Դավթյանը հաջողված է համարում հունվարի 8-16-ին Ավստրիայի Միտերսիլ քաղաքում կայացած ուսումնամարզական հավաքին հայ մարզիկների մասնակցությունը։
VNews-ի հետ զրույցում աշխարհի ու Եվրոպայի առաջնությունների մրցանակակիրը նշել է, որ այդ հանգամանքը լավատեսորեն է տրամադրում մրցաշրջանի հետագա ընթացքի համար։ Տարվա առաջին միջազգային մրցմանը հայ ձյուդոիստները մասնակցելու են մեկ ամսից։
«Ձյուդոյի եվրոպական միությունը 29-րդ անգամ էր կազմակերպել հավաքի ձևաչափով մարզումային այդ ճամբարը, որը տարեսկզբի մեր կարևորագույն միջոցառումներից է։ Թեպետ կազմակերպիչը եվրոպական կառույցն էր, սակայն մասնակցում էին նաև այլ աշխարհամասերի ներկայացուցիչներ, ինչը միայն լրացուցիչ գրավչություն և արդյունավետություն հաղորդեց մարզումային գործընթացին։ Ի դեպ, մասնակիցների թվում էին 14 օլիմպիական չեմպիոն, անցյալ տարվա աշխարհի առաջնության 5 հաղթող, 7 քաշային կարգերի միջազգային վարկանիշային աղյուսակի առաջատարներ։ Միջոցառումն ուղեկցվեց մարզիչների, մրցավարների և լրագրողների համար նախատեսված սեմինարներով։ Մարզումների ընթացքում առաջնային էին մարզումային գոտեմարտերը, որոնց զուգահեռ, իհարկե, անցկացրել ենք նաև անհատական մարզումներ։ Հավաքը ծառայեց նպատակին. տարին լավ ենք սկսել, տեսնենք, թե ինչպես կլինի հետագայում»,- նշեց հավաքականի գլխավոր մարզիչը։
Հավաքին մասնակցել են 2018 թվականի Եվրոպայի չեմպիոն Ֆերդինանդ Կարապետյանը (73 կգ), անցյալ տարվա աշխարհի երիտասարդական առաջնության չեմպիոն Գոռ Կարապետյանը (81 կգ), նախորդ մրցաշրջանում իրենց առավել լավ դրսևորած մյուս մարզիկները՝ Արսեն Ավետիսյանը (73 կգ), Ստյոպա Դարբինյանը (66 կգ), Արտյոմ Ղալաչյանը (66 կգ) և Արտակ Թորոսյանը (73 կգ): Նրանցից յուրաքանչյուրը, ինչպես նշեց Հովհաննես Դավթյանը, ներկայացել էր տարբեր աստիճանի պատրաստվածությամբ և մարզումներում լուծում էր ուրույն խնդիր։
«Ազգային հավաքականի անդամները պատրաստվում են փետրվարի 11-12-ը Բուլղարիայի մայրաքաղաք Սոֆիայում կայանալիք Եվրոպայի գավաթի խաղարկությանը, իսկ երիտասարդական թիմի առաջատարներին հնարավորություն ենք տվել նման հավաքներին մասնակցելու միջոցով բարելավել իրենց մարզական որակները։ Կարող եմ ասել, որ ընդհանուր առմամբ ամեն ինչ նորմալ ընթացավ, տղաներն իրենց լավ դրսևորեցին։ Նրանք նորմալ մարզավիճակում են, արդեն պատրաստ են մասնակցել մրցումներին։ Նրանց մարզավիճակի մասին ավելի հստակ և իրական պատկերացում կկազմենք առաջին մրցաշարերից հետո»,- հայտնեց Հովհաննես Դավթյանը։
Նա տեղեկացրեց նաև, որ վնասվածք ունեցող մարզիկները, այդ թվում՝ Ֆերդինանդ Կարապետյանը, հիմնականում ապաքինվել են. «Լուրջ խնդիրներն արդեն հետևում են։ Կան որոշ աննշան վնասվածքներ, որոնց բուժումն ընթացքում է։ Կարապետյանն արդեն վերադարձել է ազգային հավաքական։ Տարին նախաօլիմպիական է, փորձելու ենք ամեն ինչ անել, լրացնել և կարգավորել անցյալ տարվա բացերը՝ պատասխանատու մրցումներին պատրաստված ներկայանալու համար»։
Հատկանշական է, որ մարզչի պնդմամբ՝ ինքը տեղյակ չէ VNews-ին տված նախորդ հարցազրույցում Ֆերդինանդ Կարապետյանի հնչեցրած խնդիրների մասին։ «Նման հարցեր չենք քննարկել, եթե լինեին՝ տեղյակ կլինեի։ Ֆերդինանդն այսօր հավաքականում է, ուստի որևէ խնդիր չեմ տեսնում՝ առաջնորդվում ենք հավաքականի պայմաններով։ Տրամադրվածությունը լավ է, մեր հավաքականում այլ կերպ չի կարող լինել»,- նշեց 39-ամյա մասնագետը։
Բուլղարիայում Եվրոպայի գավաթի խաղարկությանը մասնակցելուց առաջ հայ ձյուդոիստները փետրվարի 1-10-ին հերթական հավաքը կանցկացնեն Երևանի «Օլիմպավանում»։ Հովհաննես Դավթյանը նշեց, որ այդ փուլում կարևորվելու է մարզիկների տեխնիկա-տակտիկական պատրաստվածությունը, ուշադրություն է դարձվելու նրանց անձնական քաշի կարգավորմանը, ինչպես նաև ամփոփվելու է մինչև այդ կատարած աշխատանքը։
