Հայաստանի գավաթի կիսաեզրափակչի պատասխան հանդիպումներից հետո հայտնի դարձան եզրափակչի մասնակիցները: 5 տարի անց, մայիսի 13-ին «Հանրապետական» մարզադաշտում պատվավոր մրցանակը կրկին կվիճարկեն «Արարատ-Արմենիան» և «Նոան»:
FastNews-ը գավաթի կիսաեզրափակչի պատասխան հանդիպումների ամենաուշագրավ իրադարձությունները ներկայացնում է 10 փաստի տեսքով:
1.Դաշտի տերերն ու հյուրերը մեկական հաղթանակ տոնեցին: Կիսաեզրափակչի առաջին հանդիպումներում պարտված թիմերը՝ «Փյունիկն» ու «Վանը» թեև պատասխան խաղում հաղթեցին, սակայն դուրս մնացին գավաթի մրցաշարից:
Գավաթի ընթացիկ խաղարկությունում կայացած 24 հանդիպումներից 10-ում հաղթել են դաշտի տերերը, 13-ում հաջողությունն ուղեկցել է հյուրերին, մեկ խաղում էլ գրանցվել է ոչ-ոքի:
Կայացած 2 հանդիպումներում խփվեց 3 գոլ (միջինը մեկ խաղում՝ 1,5 գոլ): Գավաթի ընթացիկ խաղարկության 24 հանդիպումներում արդեն գրանցվել է 91 գոլ (միջինը մեկ խաղում՝ 3,7 գոլ):
2. «Արարատ-Արմենիան» Հայաստանի գավաթի ընթացիկ խաղարկությունում առաջին պարտությունը կրեց՝ ընդհատելով 3 անընդմեջ հաղթանակների շարքը: Ընդհատվեց նաև գավաթի մրցաշարերում թիմի անպարտելի 7 խաղերի շարքը: Նախորդ պարտությունը Հայաստանի կրկնակի չեմպիոնը կրել էր գավաթի 2022/23թթ. մրցաշարում՝ քառորդ եզրափակչում 0-4 հաշվով զիջելով «Ուրարտուին»:
3. «Արարատ-Արմենիան» հետխաղյա 11մ հարվածաշարում 4-2 հաշվով հաղթելով «Փյունիկին», 3-րդ անգամ եզրափակչի ուղեգիր նվաճեց: Գավաթի մրցաշարերում «Արարատ-Արմենիային» 4-րդ անգամ հարկ եղավ հաղթողին որոշել 11մ հարվածաշարում:
Առաջին փորձությունը տեղի է ունեցել «Նոայի» հետ գավաթի 2019/20թթ. խաղարկության եզրափակչում, որում «Արարատ-Արմենիան» 11մ հարվածաշարում պարտվել է 6-7 հաշվով: Մնացած 3 դեպքերում «Արարատ-Արմենիան» հաջող է իրացրել 11մ հարվածներն ու հաղթող է ճանաչվել: 2020/21թթ. մրցաշարի քառորդ եզրափակչում Հայաստանի կրկնակի չեմպիոնը 5-3 հաշվով հաղթել է «Վանին», իսկ գավաթի նախորդ խաղարկության եզրափակչում Վարդան Մինասյանի գլխավորած թիմը նույնպիսի հաշվով առավելության է հասել «Ուրարտուի» նկատմամբ:
4. Գավաթի մրցաշարերում «Փյունիկն» առաջին անգամ հաղթեց «Արարատ-Արմենիային»: Իսկ մինչև այդ մրցակիցների միջև կայացած գավաթային երկու հանդիպումներում էլ փյունիկցիները պարտվել էին: Առաջին խաղը կայացել էր անցյալ տարվա ապրիլի 8-ին: «Ջունիոր սպորտ» մարզադաշտում կայացած կիսաեզրափակիչ այդ խաղի ելքը վճռել էր Արթուր Սերոբյանի խփած միակ գոլը:
5. «Փյունիկին» 3-րդ տարին անընդմեջ չհաջողվեց հաղթահարել կիսաեզրափակչի արգելքը: 2022/23թթ. մրցաշարում փյունիկցիները կիսաեզրափակչում 11մ հարվածաշարում 3-5 հաշվով պարտվել էին «Շիրակին» (1-1), իսկ հաջորդ խաղարկությունում նվազագույն հաշվով զիջել էին «Արարատ-Արմենիային»:
Գավաթի եզրափակչում վերջին անգամ «Փյունիկը» խաղացել է 2017թ.՝ 0-3 հաշվով պարտվելով «Շիրակին»:
6. «Նոան» Հայաստանի գավաթի ընթացիկ խաղարկությունում առաջին գոլը բաց թողեց և առաջին անգամ խաղադաշտից պարտված հեռացավ՝ ընդհատելով 4 անընդմեջ հաղթանակների շարքը: Նախորդ պարտությունը թիմը կրել էր գավաթի 2023/24թթ. մրցաշարի քառորդ եզրափակչում՝ անցյալ տարվա մարտի 11-ին սեփական դաշտում 2-3 հաշվով զիջելով «Արարատ-Արմենիային»:
«Նոան» նաև գավաթի ընթացիկ խաղարկությունում առաջին անգամ խաղադաշտից հեռացավ առանց գոլ խփելու: Գավաթի նախորդ 4 խաղերում Ռուի Մոտայի գլխավորած թիմը մրցակիցների դարպասը 11 գնդակ էր խփել:
7. Գավաթի եզրափակչի ուղեգիր նվաճելու «Վանի» 2-րդ փորձն էլ անհաջողությամբ ավարտվեց: 2021/22թթ. խաղարկության կիսաեզրափակչում «Վանը» 0-3 հաշվով պարտվել էր «Ուրարտուին»:
8. Անտոն Բրատկովը բացեց գոլերի հաշիվը գավաթի մրցաշարերում: Ընթացիկ մրցաշրջանի պաշտոնական մրցումներում դա Բրատկովի առաջին գոլն էր: Իսկ մինչև այդ ուկրաինացի պաշտպանը «Փյունիկում» առաջնությունում մեկ գոլ էր խփել՝ գրավելով «Նոայի» դարպասը:
9. «Վանին» հաղթանակ պարգևած Լևոն Վարդանյանը գավաթի մրցաշարերում 2-րդ գոլը խփեց: Նա իր գոլերի հաշիվը բացել էր ապրիլի 2-ին «Վեստ Արմենիայի» հետ կայացած քառորդ եզրափակչի պատասխան խաղում, որում «Վանը» հաղթել էր 3-2 հաշվով:
10. «Արարատ-Արմենիայի» պաշտպան Ժոաո Կեյրուշը գավաթի ընթացիկ խաղարկությունում ինքնագոլի հեղինակ դարձած 5-րդ ֆուտբոլիստն է: Նախորդ հանդիպումներում սեփական դարպասը գրավել էին Պաուլո Ռուիսը («Արաքս»), Յարոսլավ Մատյուխինը («Վան»), Գոռ Հակոբյանը («Լեռնային Արցախ») և Ալեքսանդր Պուսկոն («Ուրարտու»):
