FastNews-ը սկսում է Fastex Պրեմիեր լիգայի 33-րդ առաջնությունում մասնակից թիմերի ելույթների ամփոփումը: Այսօր կանդրադառնանք Հայաստանի չեմպիոն ու գավաթակիր «Նոային»:

1. Բարձրագույն խմբում 7-րդ մրցաշրջանն անցկացրած «Նոան» ակումբի կարճատև պատմության մեջ աննախադեպ հաջողության հասավ՝ դառնալով հայկական ֆուտբոլում ոսկե դուբլ գրանցած ընդամենը 5-րդ թիմը: «Նոան» բոլոր ցուցանիշներով գերազանցեց մրցակիցներին և առաջնության ավարտից 3 տուր առաջ պաշտոնապես գրանցեց իր չեմպիոնությունը՝ առաջին անգամ արժանանալով ոսկե մեդալների: Դա չեմպիոնության ամենաարագ գրանցումն էր վերջին 18 առաջնություններում:

Հատկանշական է, որ Ռուի Մոտայի գլխավորած թիմն ուժեղագույնը ճանաչվեց նախորդ առաջնության չեմպիոնին հաղթելու շնորհիվ: «Նոան» Հայաստանի առաջնությունների 33-ամյա պատմության մեջ դարձավ չեմպիոնի տիտղոսը նվաճած 10-րդ ակումբը: Հայաստանի գավաթն էլ «Նոան» նվաճեց գործող գավաթակիր «Արարատ-Արմենիայի» հետ մրցավեճում:

2. Fastex Պրեմիեր լիգայի 33-րդ առաջնության 30 հանդիպումներում «Նոան» վաստակեց 75 միավոր (24 հաղթանակ, 3 ոչ-ոքի, 3 պարտություն, խփած և բաց թողած գոլեր՝ 92-20), ինչը հնարավոր միավորների 83,3 տոկոսն է: Ռուի Մոտայի գլխավորած թիմը 9 միավորով գերազանցեց արծաթե մրցանակակիր «Արարատ-Արմենիային»: «Նոան» առաջնության ամենաարդյունավետ թիմն է, ինչպես նաև ամենահուսալի պաշտպանությունն ունեցող ակումբը:

3. «Նոան» Հայաստանի առաջնությունների պատմության մեջ երկու տպավորիչ ռեկորդ սահմանեց: Հայաստանի նորընծա չեմպիոնը 19 անընդմեջ հաղթանակ տարավ ու գերազանցեց 2004թ. «Փյունիկի» սահմանած ռեկորդը (16 անընդմեջ հաղթանակ):

«Նոան» դարձավ տնային բոլոր 15 հանդիպումներում էլ հաղթած միակ թիմը: Մինչև այդ սեփական դաշտում լավագույն արդյունքի էին հասել «Բանանցը» (1993թ.), «Շիրակը» (1993, 1994թթ.) և «Փյունիկը» (2003թ.), որոնք անցկացրած 14 հանդիպումներից 13-ում հաղթել էին, մեկ խաղ ավարտել էին ոչ-ոքի:

4. «Նոան» նաև բարելավեց թիմային իր մի շարք ռեկորդները: Առաջին անգամ թիմն առաջնությունը սկսեց 2 անընդմեջ հաղթանակով՝ առավելության հասնելով «Շիրակի» (5-0) և ԲԿՄԱ-ի (2-1) նկատմամբ: «Նոան»  հաղթանակով ավարտեց անցկացրած հանդիպումների 80 տոկոսը (նախորդ ռեկորդը գրանցվել էր 2023/24թթ.՝ 72,2 տոկոս, 26 հաղթանակ 36 խաղում), կրեց ընդամենը 3 պարտություն (7՝ 21 խաղում, 2020/21թթ.), խփեց 92 գոլ (69` 36  խաղում, 2023/24թթ.), խփած և բաց թողած գնդակների տարբերությունը՝ +72 (+36՝ 69-33, 2023/24թթ.), վաստակեց հնարավոր միավորների 83,3 տոկոսը (74 տոկոս, 80 միավոր 36 խաղում, 2023/24թթ.):

Ռուի Մոտայի գլխավորած թիմն առաջնությունում բոլորից շատ խոշոր հաշվով հաղթանակ տոնեց (14)՝ գերազանցելով նախորդ մրցաշրջանում գրանցած իր լավագույն արդյունքը (5` 36 խաղում): Ընդ որում «Գանձասարի» նկատմամբ 7-0 հաշվով տարած հաղթանակն ամենախոշորն էր թիմի պատմության մեջ: Մինչև ընթացիկ մրցաշրջանը «Նոայի» օգտին ամենախոշոր հաշվով հաղթանակը գրանցվել էր 2021/22թթ. ԲԿՄԱ-ի նկատմամբ՝ 5-0:

«Նոան» 23 խաղ ընթացավ առանց պարտության (13` 2023/24թթ.): Միայն «Ալաշկերտի» հետ ավարտական տուրի խաղում «Նոային» չհաջողվեց գոլ խփել: Նախորդ առաջնությունում թիմի ֆուտբոլիստները 18 անընդմեջ խաղում էին գոլ խփել:   

Չեմպիոնը մյուս թիմերից առավել հաճախ՝ 15 անգամ դարպասն անառիկ պահեց:

5. «Նոայի» մասնակցությամբ հանդիպումներում նշանակվել է 11մ 11 հարված, որից իրացվել է 8-ը: Թիմի օգտին նշանակված 11մ 9 հարվածներից իրացվել են 6-ը: Գոնսալու Գրեգորիուն խոցել է ալաշկերտցի Վալերիո Վիմերկատիի, Անդրիա Դրագոևիչի («Վեստ Արմենիա») և բանակային Հայկ Ղազարյանի պաշտպանած դարպասները: Իսկ ահա շիրակցի Դարկո Վուկաշինովիչը մեկ խաղում երկու անգամ հաղթող է դուրս եկել պորտուգալացու հետ մրցավեճում:

Գոռ Մանվելյանը դիպուկ է իրացրել իրեն վստահված երկու հարվածներն էլ՝ գրավելով շիրակցի Դարկո Վուկաշինովիչի և գանձասարցի Տիգրան Ոփանյանի պաշտպանած դարպասները:

Մաթեուս Այասը հաղթող է դուրս եկել ԲԿՄԱ-ի դարպասապահ Արման Ներսեսյանի հետ մենամարտում: Իսկ ահա «Ուրարտուի» հետ խաղում Այասի 11մ հարվածը բարձր է ստացվել:

Թիմի դարպասին նշանակված 11մ 2 հարվածներն էլ իրացվել են: ԲԿՄԱ-ի հարձակվող Արայիկ Էլոյանը գրավել է Ալեքսեյ Պլոշադնիի պաշտպանած դարպասը, փյունիկցի Էդգար Մալաքյանն էլ հաղթող է դուրս եկել Օգնյեն Չանչարևիչի հետ մենամարտում:

6. «Նոան» դարձավ 21-րդ դարում անցկացված ՀՀ առաջնությունների ամենաարդյունավետ թիմը՝ 92 անգամ գրավելով մրցակիցների դարպասները: Նորընծա չեմպիոնը գերազանցեց «Բանանցի» (2003թ.) և «Փյունիկի» (2004թ.) ցուցանիշը, որոնք անցկացրած 28 խաղում 89 գոլ էին խփել:

«Նոայի» խփած 92 գոլերի հեղինակներ դարձան թիմի 20 ֆուտբոլիստներ, մեկական գնդակ էլ սեփական դարպասը խփեցին «Արարատ-Արմենիայի» պաշտպան Խոսե Բուենոն ու Վահրամ Մախսուդյանը («Վեստ Արմենիա»): 16 ֆուտբոլիստներ բացեցին գոլերի հաշիվը «Նոայում»:

20 գնդակով թիմում ամենաարդյունավետը Գոնսալու Գրեգորիուն է, որը դարձավ առաջնության գլխավոր ռմբարկու: Նա ընդգրկվեց Fastex Պրեմիեր լիգայում «Նոայի» պատմության լավագույն ռմբարկուների եռյակում: 23 գնդակով ցանկը գլխավորում է Արթուր Միրանյանը, որին մեկ գնդակով է զիջում Մաքսիմ Մայրովիչը:

Իսկ ահա բոլոր մրցաշարերում խփած գոլերի ընդհանուր քանակով (27) Գոնսալու Գրեգորիուն դարձավ «Նոայի» պատմության գլխավոր ռմբարկուն՝ գերազանցելով Մաքսիմ Մայրովիչի ցուցանիշը (25 գոլ): Գրեգորիուն նաև ընթացիկ առաջնության մեկ խաղի արդյունավետության ռեկորդ սահմանեց՝ դեկտեմբերի 15-ին «Վեստ Արմենիայի» հետ մրցավեճում  դառնալով ֆուտբոլային պոկերի հեղինակ: Դա «Նոայի» պատմության մեջ առաջին պոկերն էր:

29-ամյա պորտուգալացի ֆուտբոլիստն առաջնության աշնանային հատվածում խփած 12 գնդակով գերազանցեց թիմի նախկին հարձակվող Արթուր Միրանյանի արդյունավետության տարիքային ռեկորդը, որը 2024թ. օրացուցային տարում 9 գոլ էր խփել:

Էրալդ Չինարին էլ դարձավ Հայաստանի առաջնություններում հեթ-տրիկ գրանցած «Նոայի» առաջին ֆուտբոլիստը: Չինարին (14 գոլ ), Մաթեուս Այասն ու Հելդեր Ֆեռեյրան (9-ական գոլ)  ընդգրկվեցին Fastex Պրեմիեր լիգայում թիմի պատմության լավագույն ռմբարկուների տասնյակում:

32-ամյա Պաբլո Ռենան դոս Սանթոսը 2024թ. օրացուցային տարում խփած 4 գոլով արդյունավետության տարիքային նոր ռեկորդ սահմանեց՝ գերազանցելով թիմի նախկին ֆուտբոլիստներ Գեղամ Հարությունյանի և Փոլ Գլադոնի ցուցանիշը, որոնք այդ տարիքում 2-ական գոլ էին խփել:

7. Զավեն Խուդավերդյանը դարձավ «Նոայում» գոլ խփած ամենաերիտասարդ ֆուտբոլիստը՝ դեկտեմբերի 8-ին «Գանձասարի» դարպասը գրավելով 17 տարեկան  176 օրականում: Նա գերազանցեց թիմի նախկին ֆուտբոլիստ Իսրայել Օպոկուի ցուցանիշը, որը «Նոայում» գոլերի հաշիվը բացել էր 18 տարեկան 145 օրականում՝ 2022թ. հոկտեմբերի 2-ին գրավելով «Վանի» դարպասը:

Խուդավերդյանը նաև «Նոայի» պատմության ամենաերիտասարդ ֆուտբոլիստն էր: Նա թիմի կազմում Fastex Պրեմիեր լիգայում նորամուտը նշել էր 17 տարեկան 71 օրականում՝ մասնակցելով օգոստոսի 25-ին ԲԿՄԱ-ի հետ կայացած հանդիպմանը: Զավենը գերազանցել էր թիմի նախկին ֆուտբոլիստ Գոռ Աբրահամյանի ցուցանիշը, որն առաջին խաղը «Նոայում» անցկացրել էր 17 տարեկան 94 օրականում:

Առաջնության գարնանային հատվածում Խուդավերդյանի ցուցանիշը գերազանցեց Արթուր Մովսեսյանը՝ փետրվարի 24-ին «Վեստ Արմենիայի» հետ խաղում նորամուտը նշելով 17 տարեկան 53 օրականում:

Առաջնության աշնանային հատվածում Հովհաննես Համբարձումյանը դարձել էր Fastex Պրեմիեր լիգայում «Նոայում» գոլ խփած ամենատարեց հայ ֆուտբոլիստը՝ նոյեմբերի 10-ին «Ալաշկերտի» դարպասը գրավելով 34 տարեկան 37 օրականում: Նա գերազանցել էր Ալեքսանդր Կարապետյանի ցուցանիշը, որը թիմի կազմում իր վերջին գոլը խփել էր 33 տարեկան 312 օրականում:

Փետրվարի 24-ին «Վեստ Արմենիայի» հետ խաղում բացելով գոլերի հաշիվը «Նոայում», Արտակ Դաշյանը դարձավ Fastex Պրեմիեր լիգայում «Նոայում» գոլ խփած ամենատարեց հայ ֆուտբոլիստը՝ մրցակցի դարպասը գրավելով 35 տարեկան 96 օրականում: 

Գոնսալո Սիլվան (33 տարեկան 334 օրական) և Գուդմունդուր Թորարինսոնն (33 տարեկան 33 օրական) ընդգրկվեցին «Նոայում» գոլ խփած ամենատարեց ֆուտբոլիստների տասնյակում:

8. «Նոայի» դարպասը պաշտպանեցին 3 դարպասապահներ: Օգնյեն Չանչարևիչը 16 խաղում նույնքան գոլ բաց թողեց, 5 խաղում դարպասն անառիկ պահեց: Նա ՀՀ առաջնություններում բոլորից շատ խաղ (191) անցկացրած և առավել հաճախ (72 անգամ) դարպասն անառիկ պահած այլազգի դարպասապահն է:

 

Պաշտոնական մրցումներում 35-ամյա սերբ դարպասապահը 88 խաղում գոլ բաց չի թողել: Եթե Չանչարևիչը հաջորդ մրցաշրջանում էլ շարունակի ելույթները, ապա մեծ հավանականությամբ կընդգրկվի Սերգեյ Զատիկյանի անվան ակումբում՝ դառնալով պաշտոնական մրցումներում 100 և ավելի խաղերում դարպասն անառիկ պահած այլազգի առաջին դարպասապահը:

Ալեքսեյ Պլոշադնին 13 խաղում ընդամենը 3 գոլ բաց թողեց, որից մեկը՝ 11մ հարվածով: Միջինը մեկ խաղում բաց թողած գոլերի քանակով (0,23 գոլ) նա առաջնության ամենահուսալի դարպասապահն է: Պլոշադնին այդ ցուցանիշով ՀՀ առաջնություններում պատմական ռեկորդի հեղինակ դարձավ՝ գերազանցելով «Փյունիկի» նախկին դարպասապահ Արմեն Ավագյանի ցուցանիշը: Վերջինս 1996/97թթ. առաջնությունում միջինը մեկ խաղում 0,29 գոլ էր բաց թողել (5 գոլ 17 խաղում):

Իր անցկացրած 6 անընդմեջ հանդիպումներում Պլոշադնին գոլ բաց չթողեց՝ դարպասը 616 րոպե շարունակ պահելով անառիկ: Այդ ցուցանիշով «Նոայի» դարպասապահը ևս լավագույնն է առաջնությունում, ինչպես նաև թիմի պատմության մեջ: Մինչև այդ ռեկորդակիրը Վալերիո Վիմերկատին էր, որը 2020/21թթ. առաջնությունում «Նոայի» դարպասը 436 րոպե շարունակ անառիկ էր պահել:

Առաջնության աշնանային հատվածում 20-ամյա Պլոշադնին տարիքային նոր ռեկորդ սահմանեց՝ գերազանցելով «Սևանի» նախկին դարպասապահ Դիոգո Ֆիգերեդոյի տարիքային ռեկորդը: Վերջինս այդ տարիքում Հայաստանի առաջնություններում հանդես եկած դարպասապահներից բոլորից երկար՝ 569 րոպե շարունակ գոլ բաց չէր թողել:

«Ալաշկերտի» հետ առաջնության ավարտական խաղում դարպասի պաշտպանությունը վստահվել էր Արթուր Կոնեգլյանին, որը Fastex Պրեմիեր լիգայում նորամուտը նշեց բաց թողած գոլով:

9. Առաջնությունում «Նոայի» ամենատարեց ֆուտբոլիստները 35-ամյա Օգնյեն Չանչարևիչն ու Արտակ Դաշյանն էին: Թիմում նորամուտը նշած Դաշյանը Fastex Պրեմիեր լիգայում անցկացրած խաղերի ընդհանուր քանակով (269) «Նոայի» ամենափորձառու ֆուտբոլիստն էր: Նա նաև բոլորից շատ՝ 50 գոլ է խփել Հայաստանի առաջնություններում: Դաշյանն ու 33-ամյա Գոնսալո Սիլվան ընդգրկվեցին Հայաստանի առաջնություններում «Նոայում» խաղացած ամենատարեց ֆուտբոլիստների տասնյակում:

Թիմի ներկայիս կազմի ֆուտբոլիստներից Fastex Պրեմիեր լիգայում «Նոայում» բոլորից շատ հանդիպումների է մասնակցել Սերգեյ Մուրադյանը՝ 63: Նա հավասարվեց թիմի ռեկորդակիր Մաքսիմ Մայրովիչին: Իսկ բոլոր մրցաշարերում անցկացրած խաղերի ընդհանուր քանակով (81) Մուրադյանը դարձավ թիմի ռեկորդակիրը՝ գերազանցելով Բենիկ Հովհաննիսյանի ցուցանիշը, որը 71 խաղի է մասնակցել:

Նոյեմբերի 20-ին «Արարատի» հետ կայացած խաղում Մուրադյանը բացել էր գոլերի հաշիվը Fastex Պրեմիեր լիգայում և ընդգրկվել էր «Նոայում» գոլ խփած ամենաերիտասարդ ֆուտբոլիստների տասնյակում (20 տարեկան 85 օրական):

10. Առաջնության 30 հանդիպումներում «Նոայի» մարզիչներն ասպարեզ դուրս բերեցին 36 ֆուտբոլիստների, որոնցից միայն 15-ն էին ազգությամբ հայ: Միայն 9 ֆուտբոլիստներ՝ Օգնյեն Չանչարևիչը, Սերգեյ Մուրադյանը, Ալեքսանդր Միլկովիչը, Հովհաննես Համբարձումյանը, Պաբլո Ռենան դոս Սանթոսը, Մարտին Գամբոշը, Գոռ Մանվելյանը, Գոռ Աբրահամյանն ու Մարսել Վիրժիլ Պինսոնն էին նախորդ  առաջնությունում խաղացել «Նոայում»:

Առաջնության հանդիպումներում «Նոայի» ֆուտբոլիստները 61 անգամ զգուշացվել են, Պաբլո Ռենան դոս Սանթոսը, Յան Էտեկին, Գոնսալու Գրեգորիուն և Հելդեր Ֆեռեյրան մեկական անգամ հեռացվել են խաղադաշտից: Առավել հաճախ՝ 7 անգամ դեղին քարտի է արժանացել Մարսել Վիրժիլ Պինսոնը:

FastNews-ը ներկայացնում է «Նոայի» ֆուտբոլիստների ցուցանիշները Fastex Պրեմիեր լիգայի 33-րդ առաջնությունում:

Ֆուտբոլիստներ	Խաղ	Գոլ	Զ (Հ)
1. Գոնսալու Գրեգորիու	26	20	2 (1)
2. Էրալդ Չինարի	26	14	2
3. Գոնսալո Սիլվա	26	3	-
4. Սերգեյ Մուրադյան	25	2	3
5. Հելդեր Ֆեռեյրա	23	9	2 (1)
6. Հովհաննես Համբարձումյան	23	4	1
7. Գոռ Մանվելյան	23	3	5
8. Յան Էտեկի	23	-	2 (1)
9. Մարսել Վիրժիլ Պինսոն	22	4	7
10. Մաթեուս Այաս	21	9	3
11. Իմրան Ուլադ Օմար	21	8	2
12. Գրենիկ Պետրոսյան	20	2	1
13. Գուստավո Սանգարե	18	-	2
14. Օգնյեն Չանչարևիչ	16	-16	4
15. Զավեն Խուդավերդյան	16	1	4
16. Արտյոմ Ավանեսյան	15	1	1
17. Բրայան Մենդոզա	15	1	2
18. Գուդմունդուր Թորարինսոն	14	2	1
19. Ալեքսանդր Միլկովիչ	14	-	4
20. Ալեքսեյ Պլոշադնի	13	-3	1
21. Բրունո Ալմեյդա	12	2	2
22. Ներմին Զոլոտիչ	12	1	3
23. Արտակ Դաշյան	12	1	1
24. Մարտին Գամբոշ	9	-	1
25. Մարկոս Պեդրո Մասիել	8	1	-
26. Պաբլո Ռենան դոս Սանթոս	7	2	-(1)
27. Արթուր Մովսեսյան	5	-	1
28. Խամես Սանթոս	5	-	1
29. Ֆոֆանա Բիլալ	2	-	1
30. Գագիկ Մելոյան	2	-	-
31. Գոռ Աբրահամյան	1	-	-
32. Արթուր Կոնեգլյան	1	-1	1
33. Անդրանիկ Կարապետյան	1	-	-
34. Գոռ Գրիգորյան	1	-	-
35. Գևորգ Գրիգորյան	1	-	-
36. Հովհաննես Գևորգյան	1	-	1