«Շատ ուրախ եմ, որ կարողացանք հաղթել Ուելսին և ես դուբլի հեղինակ դարձա, ակնհայտ էր, որ դժվար խաղ էր՝ 30 հազար հանդիսականի ներկայությամբ, սակայն հաղթեցինք»: Այդ մասին Լատվիայի հավաքականի դեմ Եվրո-2024-ի ընտրական փուլի հանդիպման նախախաղային ասուլիսում ասել է Հայաստանի ազգային հավաքականի և Մյոնխենգլադբախի «Բորուսիայի» հարձակվող Հրանտ-Լեոն Ռանոսը: Երևանում կայացած ասուլիսում 19-ամյա ֆուտբոլիստն անդրադարձել է Եվրո-2024-ի ընտրական փուլի D խմբի չորրորդ տուրի խաղին։
«Մյոնխենգլադբախի «Բորուսիայի» նորանշանակ գլխավոր մարզչի հետ խոսել եմ մեկ անգամ և կարծում եմ, որ մարզչական փոփոխությունները խնդիր չեն, քանի որ տեղափոխությանս հարցում առանցքային դեր ունեցել են մենեջերները:
Կարծում եմ, որ Լատվիայի հավաքականի դեմ նույնպես բարդ խաղ է լինելու, ինչպես Ուելսի դեպքում էր, բավականին ուժեղ, ամուր: Հայաստանի հավաքականում ամբողջովին հարմարվել եմ, մարզիչը և թիմի մյուս ֆուտբոլիստները շատ են ինձ օգնում՝ հաշվի առնելով, որ ես հայերեն չեմ խոսում:
Ակումբը փոխելու որոշում կայացրի՝ խորհրդակցելով ընտանիքիս հետ, քանի որ ցանկանում էի քայլ առաջ կատարել: Շատ ուրախ եմ, որ այդ որոշումը կայացրի և մեծ անհամբերությամբ սպասում եմ այդ մարտահրավերին
Ազգային հավաքականում յուրաքանչյուր ֆուտբոլիստի հետ լավ համագործակցում եմ, բայց կարծում եմ, որ Էդուարդ Սպերցյանն ինձ ավելի լավ է հասկանում: Վստահ եմ, որ հաջորդ խաղերին այդ համագործակցությունն ավելի կսերտանա»,- նշել է Հրանտ-Լեոն Ռանոսը:
Հայաստան - Լատվիա հանդիպումը կկայանա հունիսի 19-ին Վազգեն Սարգսյանի անվան «Հանրապետական» ստադիոնում և կմեկնարկի Երևանի ժամանակով 20:00-ին: Հանդիպումը կցուցադրվի «Ֆասթ Սպորտ-1»-ի ուղիղ եթերում:
Հիշեցնենք, որ Եվրո-2024-ի ընտրական մրցաշարի երրորդ տուրում Հայաստանի հավաքականը 4-2 հաշվով արտագնա հաղթանակ էր տարել Ուելսի նկատմամբ, իսկ Ռանոսը դարձել էր դուբլի հեղինակ:
Եվրո-2024-ի ընտրական մրցաշարի D խմբում ընդգրկված են նաև աշխարհի առաջնության բրոնզե մեդալակիր Խորվաթիայի և Թուրքիայի հավաքականները։