Հայաստանի Զինված ուժերի Գլխավոր շտաբի ֆիզիկական պատրաստության և սպորտի ծառայության պետ, գնդապետ Արման Դավթյանը, Ռազմական սպորտի միջազգային խորհրդի նախագահ, գնդապետ Ռոլիմ Նիլտոնը, Ռազմական սպորտի միջազգային խորհրդի մարզական տնօրեն, գնդապետ Յան Վան Դեն Դուլը, Ռազմական սպորտի միջազգային խորհրդի ըմբշամարտի պատասխանատու Նասեր Հասանին Երևանի Կարեն Դեմիրճյանի անվան մարզահամերգային համալիրում նոյեմբերի 20-22-ը կայանալիք ըմբշամարտի բանակայինների աշխարհի առաջնությանն ընդառաջ հանդես են եկել ասուլիսով, հաղորդում է FastNews-ի թղթակիցը։
Արման Դավթյանն անդրադարձել է Հայաստանի առաջատար ըմբիշների՝ հայտացուցակում չընդգրկվելուն։
«Որոշակի սահմանափակումներ են գործում նաև զինծառայողի կարգավիճակ ունեցող ըմբիշների համար։ Կազմը չի ընտրել Հայաստանի ըմբշամարտի ֆեդերացիան, որոշումը կայացրել են ՊՆ համապատասխան մասնագետները։
Հայաստանը մարտունակ կազմով է մասնակցելու։ Հայտացուցակից դուրս մնացած տղաները մինչև այսօր հավաքականի կողքին են և բոլոր առումներով օգնում են թիմին։
Բանակայինների ԱԱ-ին կմասնակցեն 24 երկրների հավաքականներ, Ադրբեջանը մասնակցության հայտ չի ներկայացրել»,- նշել է Արման Դավթյանը։
ՊՆ պաշտոնյան ներկայացրել է հունահռոմեական և ազատ ոճի ըմբշամարտի Հայաստանի հավաքականների կազմերը։
Հունահռոմեական ոճ
Տիգրան Մինասյան (55 կգ), Սուրեն Աղաջանյան (60 կգ), Հրաչյա Պողոսյան (63 կգ), Գասպար Տերտերյան (67 կգ), Շանթ Խաչատրյան (72 կգ), Աշոտ Խաչատրյան (77 կգ), Սամվել Գրիգորյան (82 կգ), Կարեն Խաչատրյան (87 կգ), Դավիթ Օվասապյան (130 կգ):
Ազատ ոճ
Արման Հարությունյան (57 կգ), Սարգիս Բեգոյան (61 կգ), Անդրանիկ Ավետիսյան (65 կգ), Արտավազդ Հարությունյան (70 կգ), Հրայր Ալիխանյան (74 կգ), Արման Ավագյան (79 կգ), Մուշեղ Մկրտչյան (92 կգ), Հենրիկ Հայկյան (120 կգ):
Հիշեցնենք, որ Հայաստանի առաջատար ըմբիշներից բանակայինների ԱԱ-ին չեն մասնակցի այժմ ժամկետային զինծառայության մեջ գտնվող Մալխաս Ամոյանը, Արսեն Հարությունյանը, Վազգեն Թևանյանը, Արման Անդրեասյանը և Մանվել Խնձրցյանը:
