Տիվատի «Արսենալը» 10 տարով զրկվել է եվրագավաթային մրցաշարերին մասնակցելու իրավունքից, հայտնում է ՈՒԵՖԱ-ի պաշտոնական կայքը։
Չեռնոգորական ակումբը մեղադրվել է 2023/24 մրցաշրջանում «Ալաշկերտի» դեմ Կոնֆերենցիաների լիգայի որակավորման առաջին փուլի դիմակայությունում պայմանավորված հանդիպում կազմակերպելու համար։
Դիմակայության պատասխան հանդիպումը համարվել է կասկածելի` անօրինական խաղադրույքներով պայմանավորված։ Հանդիպումից առաջ հսկայական գումարով խաղադրույքներ են կատարվել։
Տիվատի «Արսենալի» խաղացող Նիկոլե Չելեբիչուն և ակումբի մարզական տնօրեն Ռանկո Կրգովիչը ցմահ որակազրկվել են ու չեն կարող ծավալել ֆուտբոլային գործունեություն։ Ֆուտբոլիստներ Չետկո Մանոյլովիչը, Ռադուլե Ժիվկովիչը և Դուլան Պոլետիշն էլ որակազրկվել են 10 տարով։ Ակումբը նաև տուգանվել է 500 հազար եվրոյով։
«Ալաշկերտը» վերոնշյալ դիմակայության առաջին խաղում սեփական դաշտում ոչ-ոքի (1-1) էր գրանցել, իսկ պատասխան մրցավեճում հյուրընկալվելիս հաղթել էր 6-1 հաշվով։
