ԱՄՆ-ում մեկնարկեց NBA-ի փլեյ-օֆֆի Արևմտյան կոնֆերենցիայի կիսաեզրափակիչի «Օքլահոմա Սիթի» – «Դենվեր» դիմակայությունը, որի առաջին խաղի վերջին վայրկյաններին հյուրերը հաղթանակ կորզեցին:

Հանդիպման մեծ մասում «Նագեթսը» հաշվի մեջ զիջում էր, իսկ չորրորդ քառորդի միջնամասում տարբերությունը 13 միավոր էր: Այդուհանդերձ, Նիկոլա Յոկիչի կազմակերպած քամբեքը հաղթական ավարտի հասցրեց Աարոն Գորդոնը, որը խաղավարտից 3 վայրկյան առաջ 3-միավորանոց նետում կատարեց և իր թիմին առաջ մղեց հաշվի մեջ: Ջելեն Ուիլյամսը փորձեց փրկել «Թանդերին» սեփական կիսադաշտից նետումով, բայց վրիպեց: «Դենվերը» հաղթեց 121-119 հաշվով և դիմակայությունում հաշվի մեջ առջևում է՝ 1-0: Երկրորդ հանդիպումը նույնպես կկայանա Օքլահոմայում:

Ընթացիկ մրցաշրջանում լիգայի ամենաարժեքավոր բասկետբոլիստի կոչման հիմանական 2 թեկնածուները հիանալի խաղ անցկացրին: «Դենվերի» առաջատար Նիկոլա Յոկիչը գրանցեց 42 միավոր, 22 ռեբաունդ և 6 ասիստ: «Թանդերի» ռմբարկու Շեյ Գիլջես-Ալեքսանդրը վաստակեց 33 միավոր, կատարեց 10 ռեբաունդ ու 8 ասիստ:

Մինչև հանդիպման վերջին րոպեն խաղի լավագույնի կոչման հիմնական թեկնածուն «Օքլահոմայի» պաշտպան Ալեքս Կարուզոն էր, որը, պահեստայինների նստարանից ասպարեզ դուրս գալով, 26 րոպեում գրանցեց 20 միավոր, 6 ասիստ, 5 խլում, 2 բլոք:  

Այսօրվա խաղից առաջ «Դենվերը» հանգստացել էր 2 օր, իսկ «Թանդերը»՝ 10: