Լյուիս Հեմիլթոնը Ֆորմուլա 1-ի պատմության մեջ առաջին և միակ սևամորթ չեմպիոնն է և Միխայել Շումախերից հետո երկրորդը, որը 7 անգամ դարձել է արքայական ավտոսպորտի աշխարհի չեմպիոն: Լյուիս Կառլ Դևիդսոն Հեմիլթոնն իր անունը ստացել է ի պատիվ Օլիմպիական խաղերի 9-ակի և աշխարհի 8-ակի չեմպիոն, ամերիկացի արագավազորդ և հեռացատկորդ Կառլ Լյուիսի: Հեմիլթոնը ծնվել է բրիտանուհի Կարմեն Լարբալեստիերի և Գրենադայից Մեծ Բրիտանիա գաղթած Էնթոնի Հեմիլթոնի ընտանիքում: Լյուիսի ծնողները բաժանվեցին, երբ տղան ընդամենը 2 տարեկան էր:

Հեմիլթոնի ու ավտոսպորտի առաջին հանդիպումը եղավ տղայի 6-րդ տարեդարձի օրը: Հայրը Լյուիսին հեռակառավարվող խաղալիք մեքենա էր նվիրել: Ընդամենը մեկ տարի հետո Լյուիսը մասնակցեց հեռակառավարվող մեքենաների մարզային մրցման և հաղթեց բոլորին: Էնթոնի Հեմիլթոնն օրեցօր համոզվում էր, որ տղան հատուկ տաղանդ ունի և Լյուիսին առաջարկեց զբաղվել ավտոսպորտով: 1993 թվականին, 8 տարեկանում, Ֆորմուլա 1-ի ապագա աստղը սկսեց զբաղվել կարտինգով։ Երկու տարի անց Հեմիլթոնն իր տարիքային խմբում դարձավ Մեծ Բրիտանիայի չեմպիոն: Սպորտում, կյանքում և առհասարակ ամենուր, ցանկացած հաջողություն նաև մեդալի հակառակ կողմն ունի: Որպեսզի Լյուիսը զբաղվեր ավտոսպորտով, Էնթոնի Հեմիլթոնը միաժամանակ 4 աշխատանք էր անում: Չնայած դժվարություններին հայր ու տղա մեկ երազանք ունեին՝ դառնալ Ֆորմուլա 1-ի չեմպիոն: Հեմիլթոնների երազանքը ծիծաղելի էր նրանց շրջապատի համար ու ինչպես Լյուիսն է պատմում, շատերն անգամ ծաղրում ու մականուններ էին հորինում իրենց համար: Ամենօրյա գոյության կռիվն ու անքուն գիշերների աշխատանքը Հեմիլթոնների ձգտման վրա չէր ազդում, նրանք իրենց խոսքը մրցուղում էին ասելու:

Հեմիլթոնի կյանքում ամեն բան գլխիվայր շրջվեց Ռոն Դենիսի հետ պատահական հանդիպումից հետո: Հերթական մրցարշավից հետո Լյուիսը, նկատելով «Մաքլարենի» ապագա ղեկավարին, չկորցրեց պահը, մոտեցավ ինքնագիր խնդրելու և Ռոնի հետ զրույցում համարձակորեն ասաց, որ երազում է մի օր «Մաքլարենի» ղեկին հայտնվելու մասին: Դենիսը գնահատեց տղայի համարձակությունն ու նոթատետրում հեռախոսահամարը թողնելով՝ Հեմիլթոնին խնդրեց իր հետ կապվել 9 տարեկան դառնալուց հետո: 1998-ին, երբ Ռոնն արդեն «Մաքլարենի» ղեկավարն էր, կատարեց խոստումն ու Լյուիսին ընդգրկեց երիտասարդ պիլոտների աջակցման ծրագրում:

2007-ին Լյուիս Հեմիլթոնը «Մաքլարենի» կազմում նորամուտը նշեց Ֆորմուլա 1-ում և առաջին իսկ Գրան պրիում պոդիում բարձրացավ՝ Ավստրալիայում զբաղեցնելով երրորդ տեղը: Բրիտանական կոնցեռնում Հեմիլթոնի թիմակիցն աշխարհի չեմպիոն Ֆեռնանդո Ալոնսոն էր՝ այդ ժամանակահատվածում մոլարակի լավագույն պիլոտը: Լյուիսի թիմում հայտնվելու առաջին պահից նրա և իսպանացու միջև հարաբերությունները նույն առվով չգնացին: Պիլոտների միջև ատելություն կար, և դա նրանք չէին թաքցնում: Հեմիլթոնը վայելում էր բրիտանական մամուլի ու թիմի ղեկավարության աջակցությունը, ինչն աններելի էր Ալոնսոյի համար: Թիմը ներսից պառակտված էր, արդյունքում՝ 2007-ին Կիմի Ռայկոնենն ու «Ֆերարին» հաղթեցին չեմպիոնական մրցավազքում:

2008-ին Ալոնսոն հեռացավ «Մաքլարենից», իսկ Լյուիս Հեմիլթոնը երկրորդ փորձով կարիերայում առաջին անգամ դարձավ Ֆորմուլա 1-ի չեմպիոն: Նույն տարում հարցազրույցներից մեկի ժամանակ Միխայել Շումախերն ասաց, որ բրիտանացու մեջ տեսնում է պիլոտի, որն ունակ է գերազանցել իր ռեկորդն ու նոր պատմություն գրել արքայական ավտոսպորտում: Հեմիլթոնի հաղթողի բնավորությունն ու բոլոր հարցերում առաջինը լինելու մղումն ազդեց նրա և հոր հարաբերությունների վրա: Էնթոնին փորձում էր որդու հետ կապված բոլոր կարևոր որոշումներում ունենալ իր մասնակցությունը, ինչը դուր չէր գալիս Լյուիսին: Որդու և հոր հարաբերություններն այնքան սրվեցին, որ նրանք սկսեցին անգամ չշփվել մինչև 2020 թվականը: Լյուիս Հեմիլոթնի կարիերայի բեկումնային պահը 2013 թվականին «Մերսեդես» տեղափոխությունն էր: Նրա հետ գերմանական կոնցեռնն անկասելի դարձավ։ «Մերսեդես» տեղափոխությունից հետո բրիտանացին մինչև 2020 թվականը  6 անգամ հաղթեց Ֆորմուլա 1-ում՝ այդ ընթացքում ընդամենը մեկ անգամ պարտվելով թիմակից Նիկո Ռոզբերգին:

Բացի մարզական կարիերայից, Լյուիս Հեմիլթոնն աչքի է ընկնում նաև կենդանիների պաշտպանությանն ուղղված ակցիաներով և սոցիալական ցանցերի իր էջերում հաճախակի հրապարակումներ է կատարում: Հեմիլթոնը շների մեծ սիրահար է: Նրա փոքրիկ ընկեր Ռոսկոն համացանցի աստղ է: 2017-ին Ֆորմուլա 1-ի գերաստղը հայտարաեց, որ ինքն ու Ռոսկոն վեգան են և այլս չեն սնվելու կենդանական ծագման սնունդով: Աշխարհի 7-ակի չեմպիոնը նաև երաժշտության մեծ սիրահար է և մի քանի գործիքի է տիրապետում: Լյուիսը 2013 թվականին բրիտանացի երգիչ Էնջլի հետ 12-ից ավելի երգ է թողարկել, բայց այդ երգերն այդպես էլ լայն տարածում չգտան: 2015-ին Հեմիլթոնը ևս մեկ անգամ իրեն փորձեց երգարվեստում՝ այս անգամ մոտավորապես 80 երգ թողարկելով: Նա բազմիցս հայտարարել է, որ ավտոարշավորդի կարիերայից հետո հենց երաշտության բնագավառում է պատկերացնում իրեն: Պատահական չէ, որ նրա կյանքի սերը երգչուհի է: Հեմիլթոնը երկար տարիներ սիրավեպ է ունեցել աշխարհռչակ Նիկոլ Շերզինգերի հետ, բայց մի քանի անգամ միացում բաժանումից հետո զույգն այնուամենայնիվ որոշեց չշարունակել հարաբերությունները:

2024 թվականին արքայական ավտոսպորտում շոկային նորություն եղավ: Լյուիս Հեմիլթոնը «Մերսեդեսը» կփոխի «Ֆերարիով»: Պիլոտի ու սկուդերիայի միջև պայմանագիրը կգործի 2025 թվականից: 39-ամյա պիլոտն իր որոշումը հիմնավորում է նրանով, որ մանկուց երազել է լինել կարմիր նետերի կազմում: 2024 թվականի մրցաշրջանը նոր է սկսվել, բայց Ֆորմուլա 1-ի երկրպագուներն արդեն հիմա սկսել են նախապատրաստվել 2025-ին, որպեսզի ականատես լինեն Լյուիս Հեմիլթոնի ու սկուդերիայի սիրո պատմությանը: Այն գուցե կարճ տևի, ինչպես Հեմիլթոնի կյանքում բոլոր սիրային պատմությունները, բայց կարող է նրան թույլ տալ դառնալ Ֆորմուլա 1-ի աշխարհի առաջին 8-ակի չեմպիոնը:

2010 թվականին լեգենդար Միխայել Շումախերը «Ֆերարիից» տեղափոխվեց «Մերսեդես» և մնաց ձեռնունայն, 2025-ին Հեմիլթոնը «Մերսեդեսը» կփոխի «Ֆերարիով» և գուցե արքայական ավտոսպորտում սկուդերիան բրիտանացուն դարձնի բոլոր ժամանակների լավագույնը՝ գերազանցելով հենց նորին մեծություն գերմանացուն...