Հունիսի 26-29-ը օվկիանոսից այն կողմ կհնչի Արամ Խաչատրյանի փառահեղ երաժշտությունը՝ Հայաստանի պետական սիմֆոնիկ նվագախմբի, վիրտուոզ ջութակահար Սերգեյ Խաչատրյանի կատարմամբ և նվագախմբի գեղարվեստական ղեկավար, գլխավոր դիրիժոր Սերգեյ Սմբատյանի ղեկավարությամբ: Լոս Անջելեսի «Ուոլթ Դիսնեյ» համերգասրահում հունիսի 29-ին կայանալիք համերգի տոմսերն արդեն սպառվել են: Սերգեյ Սմբատյանի խոսքով՝ դա նշանակում է, որ դասական երաժշտությունը հանրության շրջանում պահպանում է իր կարևոր տեղը: «Տոմսերի սպառումը խոսում է շուկայական մեծ արժեքի մասին: Համեմատության համար կարող եմ ասել, որ ամենաբարձր դասի նվագախմբերը Դիսնեյում 1 ամիս կամ 20 օր առաջ չեն ունենում «sold out»», - կարևորեց Հայաստանի պետական սիմֆոնիկ նվագախմբի գեղարվեստական ղեկավարը:
Սիմֆոնիկ նվագախումբը համերգները կունենա հունիսի 26-ին Բոսթոնի «Սիմֆոնի Հոլում»‚ ինչպես նաև հունիսի 27-ին՝ Նյու Յորքի «Քարնեգի Հոլում»:
