Մադրիդի «Ռեալի» նախկին կիսապաշտպան Գուտին մակագրված մարզաշապիկ է ուղարկել իտալական «Նապոլիի» վրացի վինգեր Խվիչա Կվարացխելիային, հայտնում է Marca-ն:
Ավելի վաղ 22-ամյա ֆուտբոլիստը հարցազրույցներից մեկում խոստովանել էր, որ Գուտին իր մանկության կուռքն է և նրա ելույթները ոգեշնչել են իրեն: Մարզաշապիկից բացի, իսպանացին ուղարկել է նամակ, որը Կվարացխելիան կարդացել է ուղիղ եթերում:
«Շնորհակալություն, որ սիրել ես իմ ֆուտբոլը: Քո խաղը բազմաթիվ երեխաների կստիպի սիրահարվել ֆուտբոլին: Հուսով եմ՝ քեզ դուր կգա մարզաշապիկը, իսկ քո բոլոր երազանքները կիրականանան: Սպասում եմ քեզ «Ռեալում»: Հուսով եմ՝ շուտով կհանդիպենք»,- գրել է Գուտին:
Հիշեցնենք, որ Գուտին «Ռեալի» սան է, մադրիդցիների գլխավոր թիմում ելույթ է ունեցել 1996-2010 թվականներին, որից հետո տեղափոխվել է թուրքական «Բեշիքթաշ» ու ավարտել կարիերան:
Կվարացխելիան 2022 թվականի հունիսին Դինամոյի «Բաթումիից» է տեղափոխվել «Նապոլի», որի կազմում ընթացիկ մրցաշրջանում անցկացրած 28 խաղում դարձել է 13 գոլի և 15 գոլային փոխանցման հեղինակ:
