Հունիսի 19-ին, ժամը 19։30-ին «Թատրոն 8»-ում տեղի կունենա «Սիրո մասին» կամ «Про любовь» ներկայացման պրեմիերան։ Այն պատմում է՝ ինչպիսին է սերն առանց չափազանցության և ողբերգական շեշտադրման։ Ներկայացումը հյուսված է Անտոն Չեխովի իրական նամակներից, որոնք հասցեագրված են նրա կնոջը, ինչպես նաև հեղինակի հայտնի «Առաջարկություն» պատմվածքից։ Միասին նրանք ստեղծում են մի պատկեր, որում արտացոլվում է սիրո առօրյա, մի փոքր զվարճալի, երբեմն էլ՝ հուզիչ կողմը՝ այնպիսին, ինչպիսին մենք հանդիպում ենք նրան ամեն օր։ «Այս գործը ընտրելու հարցում մեղավոր է Վլադիմիր Տառասյանցը (ծիծաղում է, - հեղ․)։ Նա ներկայացման ռեժիսորն է։ Խաղում են Զառա Հակոբյանը, Լուսինե Կոստանյանն ու Անտոն Աղաջանյանը։ Չեխովին մարմնավորում է Անտոնը։ Փնտրեցինք այնպիսի դերասանի, ում անունը ևս Անտոն լինի (ծիծաղում է, - հեղ․)», - պատմեց «Թատրոն 8»-ի հիմնադիր Ժաննա Հովակիմյանը։

Ներկայացումը ռուսերեն է։ Անտոն Աղաջանյանը Կոնստանտին Ստանիսլավսկու անվան ռուսական պետական դրամատիկական թատրոնի դերասան է։ Ստեղծագործական կազմն ընտրել է այնպիսի դերասանի, ով վարժ կտիրապետի ռուսերենի։ «Սա «Թատրոն 8»-ի համար բացառիկ երևույթ է, քանի որ մինչև այս երբեք չենք ունեցել ռուսերենով ներկայացում։ Պարզապես երբ առնչվում ես Ֆեոդոր Դոստոևսկու կամ Անտոն Չեխովի հետ, հասկանում ես, որ թարգմանությամբ կկորցնես հեղինակների ինքնատիպությունը։ Ոչ ոք չի ասում, որ հայերենով չի լսվի, բայց շատ կարևոր կորիզ կկորցնեինք։ Այդ պատճառով որոշեցինք թողնել բնօրինակ լեզվով։ Երկար ժամանակ մեզնից հարցնում էին՝ «Թատրոն 8»-ը ունենալու է ներկայացում, որը չի լինի դրամա։ Հիմա կարող եմ վստահաբար ասել՝ այո՛։ Սա լիրիկական կատակերգություն է։ Այս ներկայացումից հանդիսատեսն իր հետ կտանի շատ տեղեկություն Չեխովի կյանքից և մյուս գործերից, քանի որ ներկայացրել ենք նաև մեջբերումներ մյուս աշխատանքներից», - ընդգծեց Ժաննան։ 

Անտոն Աղաջանյանը

Բեմադրությունում ներառված են նաև Չեխովի հայտնի պիեսներից մենախոսություններ։ Դերասանները ռեժիսորի հետ աշխատում են օնլայն, թեպետ խոստովանում են՝ Տառասյանցը օնլայն ավելի լավ է տեսնում, լսում, զգում, քան շատ այլ ռեժիսորներ կենդանի շփման ժամանակ։ «Զառային ճանաչում եմ վաղուց, բայց իր մոնոններկայացումն ինձ շատ էր տպավորել։ Լուսինեի հետ աշխատել ենք, և երբ փնտրում էի լավ ռուսերենով դերասանուհու, անմիջապես հիշեցի նրան։ Դերասաններին սկզբում ընտրում եմ ես, ապա ցույց եմ տալիս Տառասյանցին, և միասին որոշում ենք՝ ում հետ ենք աշխատելու։ Եղել են դերասաններ, որոնց նկարները ցույց եմ տվել, ասել է՝ ո՛չ, չի համապատասխանում դերին», - նշել է «Թատրոն 8»-ի հիմնադիրը։

Զառա Հակոբյանը

Լուսինե Կոստանյանը