Այս օրերին իսպանական ֆուտբոլում ոչ թե քննարկվում է մրցաշարային աղյուսակի տարբեր գոտիներում ծավալված պայքարը, այլ բոլոր պարբերականների առաջին էջերին մեկ թեմա է. Մադրիդի «Ռեալի» աստղ Վինիսիուսն ու ռասիզմը:
«Մեստալիայում» տեղի ունեցած միջադեպը ոչ առաջինն էր, ոչ երկրորդը Վինիսիուսի կարիերայում: Բրազիլացու ճանապարհը Մադրիդում երկու կողմ ունի. գեղեցիկ կողմը մարզականն է՝ գավաթներով, գոլերով, խաղային զարգացմամբ, իսկ մյուս՝ տգեղ կողմը, նրա տանջանքներն ու դժվարությունները՝ կապված տարատեսակ վիրավորանքների, ռասիստական կոչերի ու նվաստացումների հետ:
«Գրոհներ»՝ առաջին իսկ օրվանից
«Ռեալի» մարզաշապիկով Վինիսիուսի անցկացրած առաջին խաղում մրցակցի ֆուտբոլիստը կծել էր նրա գլուխը: «Աթլետիկո Բ»-ի դեմ խաղն էր, երբ բրազիլացին դեռ խաղում էր «Ռեալի» երիտասարդական թիմում: 2018-ի սեպտեմբերի 2-ին, դեռ նոր 18 տարեկան Վինիսիուսն արդեն բազմաթիվ մեմերի զոհ էր դարձել, քանի որ Խուլեն Լոպետեգին նրան առաջին թիմում օգտագործելուց առաջ «ուղարկել» էր «Կաստիլյա»: Նրա համար «Ռեալը» 45 միլիոն եվրո էր վճարել, ինչն արդեն իսկ պատճառ էր ֆուտբոլիստի վրա «հարձակում» գործելու: Մրցակցի ֆուտբոլիստներն ու երկրպագուներն անհամբերությամբ սպասում էին նրան: Եվ ահա, «Աթլետիկո Բ»-ի ավագ Տաչին պարգևեց նրան առաջին «նվերը»:
Այդ օրվանից սկսած Վինիսիուսը չդադարեց տհաճ իրավիճակներում հայտնվել: Այդ միջադեպից 5 շաբաթ անց՝ հոկտեմբերի 21-ին, Իսպանիայում ստանալու էր իր առաջին կարմիր քարտը: «Սելտայի» երկրորդ թիմի դեմ հանդիպմանը մրցավարի որոշմանը արձագանքելու, և ապա՝ մրցակցի տուգանային հրապարակում ընկնելու (մրցավարը դա սիմուլյացիա որակեց) համար նա ժամանակից շուտ գնաց լոգանք ընդունելու: Այդ խաղում նրա հետ պայքարում 8 անգամ խախտել էին կանոնները: Խաղադաշտից հեռանալիս Վինին լսեց իր հասցեին առաջին վիրավորանքները, և արձագանքեց այնպես, ինչպես այժմ՝ ցույց տվեց «Ռեալի» տարբերանշանը:
Ֆուտբոլային ծաղրանքներ ու քննադատություններ
Վինիսիուսին ծաղրում էին նաև գոլեր չխփելու, վրիպումներ թույլ տալու և ցածր արդյունավետության համար: Բնականաբար, 18-ամյա հարձակվողն այնպես չէր եզրափակում գրոհները, ինչպես 22-ամյա Վինին, ինչի պատճառով բրազիլացին անդադար ենթարկվում էր քննադատության ինչպես մարզական պարբերականներում, այնպես էլ՝ սոցիալական ցանցերում: Այդ ամենից անմասն չէին նաև մրցակցի երկրպագուներն ու ֆուտբոլիստները: «Բարսելոնայի» պաշտպան Էրիկ Գարսիան Կլասիկոներից մեկի ժամանակ ծաղրանքով Վինիսիուսին ասել էր, որ նա հաջորդ տարի «Ոսկե գնդակն» է նվաճելու: Բայց բրազիլացին անդադար ցույց էր տալիս, որ այդ ամենն իր վրա ազդեցություն չի ունենում. «Ես խփելու եմ իմ գոլերը, ինձ համար լավագույն օրինակը Ստեռլինգն է: Ես Բրազիլիայից շատ վաղ տարիքում եմ հեռացել ու պատրաստվում եմ շատ մեծ նվաճումների հասնել:
2019-ի սեպտեմբերի 25-ին Վինին գրավեց «Օսասունայի» դարպասն ու արտասվեց՝ ցույց տալով, որ հաղթահարել է այն ահռելի ճնշումը, որ գործադրվում էր իր վրա: «Սանտիագո Բեռնաբեու» ստադիոնում հավաքված երկրպագուներն էլ փորձում էին օգնել նրան:
Ռասիզմն ու ատելության մեծ չափաբաժինը
Բայց կա մի բան, որ Վինիսիուսի վրա իսկապես ազդեցություն է ունենում. ռասիստական վանկարկումը: Բրազիլացին և նրա մտերիմները չեն դադարում պայքարել այդ արատավոր երևույթի դեմ, որ շրջապատում է նրանց տարիներ շարունակ: 2021/22 մրցաշրջանում «Կամպ Նոու» ստադիոնում Վինին առաջին անգամ բախվեց այդ խնդրին: 2021-ի հոկտեմբերի 24-ին հայց ներկայացվեց, բայց ոչ ոք չկարողացավ պարզել վանկարկումների ինքնությունը, ու այս երևույթը շարունակական բնույթ կրելով հասավ «Մեստալիա»:
Արդեն այս մրցաշրջանում իսպանական ֆուտբոլում մեկ այլ «չտեսնված» երևույթ եղավ: 2022-ի սեպտեմբերի 18-ին կայանալիք «Աթլետիկո» - «Ռեալ» խաղից առաջ «Աթլետիկոյի» որոշ երկրպագուներ Վինիսիուսի տիկնիկ էին պատրաստել և այն կախել Մադրիդի կամուրջներից մեկից:
Այս անգամ Լա լիգան հայց ներկայացրեց նմանատիպ գործերով զբաղվող դատախազություն, բայց գործն ընթացք չստացավ. «Չկա հստակ քայլ ինչ-որ մեկի կողմից՝ ուղղված կոնկրետ անձի: Իսկ այն, ինչ եղել է, տևել է մի քանի վայրկյան»,- սա էր դատախազության պարզաբանումը:
7 տարբեր ստադիոններում՝ «Խոսե Սորիլյայում», «Սոն Մոիքսում», «Ռամոն Սանչես Պիսխուանում», «Բենիտո Վիլյամարինում», «Կամպ Նոուում» և «Մեստալիայում» Վինիսիուսը «հարձակման» է ենթարկվել նախորդ մրցաշրջանից սկսած: Եթե բոլոր դեպքերում Վինին լուռ է պայքարել քսենոֆոբիայի՝ անհանդուրժողականության դեմ, ապա Վալենսիայում բրազիլացին ասաց «բավակա՛ն» է: Նրա գործողությունները, վերաբերմունքն ու արցունքները տպավորեցին ֆուտբոլային աշխարհին ու այժմ բոլորը նրա կողքին են:
Ի վերջո՝ պատժամիջոցները հետևեցին մեկը մյուսին: «Վալենսիայի» այն երկրպագուները, որոնք Վինիսիուսին կապիկ էին անվանել, ցմահ զրկվեցին ստադիոն ոտք դնելու հնարավորությունից, Իսպանիայի ֆուտբոլի ֆեդերացիան աշխատանքից ազատեց VAR-ի 6 մրցավարներին՝ Իգլեսիաս Վիլյանուեվայի գլխավորությամբ, որոնք Ռիկարդո դե Բուրգոս Բենգոեչեային ցույց չէին տվել այն դրվագի կրկնապատկերը, երբ Հուգո Դուրոն խեղդում էր Վինիսիուսին, «Մեստալիա» ստադիոնն էլ ժամանակավորապես փակվել է: Վինիսիուսն իր աջակցությունը ստանում է նաև հայրենիքից: Բրազիլիայի նախագահը հանդես եկավ հատուկ հայտարարությամբ, իսկ Ռիո դե Ժանեյրոյի Հիսուսի արձանի լույսերը չվառվեցին՝ որպես բողոքի նշան:
Չափազանց անհատական վերահսկողություն
Վինիսիուսը երբեմն նաև անհատական այնպիսի վերահսկողության է ենթարկվում, որը դուրս է խաղի ու տակտիկայի բոլոր կանոններից: «Մալյորկայի» դեմ՝ Անտոնիո Ռաիլյոն և Պաբլո Մաֆեոն, «Ռայո Վալեկանոյի» դեմ՝ Իվան Բալիուն, «Վալենսիայի» դեմ՝ Հուգո Դուրոն... այս ֆուտբոլիստները փորձում էին վերահսկել, վնասազերծել Վինիսիուսին, բայց ոչ թե ֆուտբոլային, այլ տարբեր մարզաձևերի հնարքներ կիրառելով: Տպավորություն է ստեղծվում, որ Վինին պետք է թիկնապահների ուղեկցությամբ դուրս գա խաղադաշտ:
«Արքայական ակումբի» ղեկավարությունը և թիմի գլխավոր մարզիչ Կառլո Անչելոտին իր ասուլիսների ժամանակ մրցավարներից պահանջում է պաշտպանել բրազիլացուն, բայց մրցավարները ոչ միշտ են խիստ վարվում, ինչի հետևանքով էլ ագրեսիան շարունակական բնույթ է կրում:
Այսպիսին է Վինիսիուսի ոչ մարդկային ճանապարհը, որին ֆուտբոլիստը ցանկանում է վերջ դնել: «Ռեալը» ձեռնարկում է հնարավոր բոլոր միջոցներն իր գլխավոր աստղերից մեկին պաշտպանելու, և ինչու ոչ, նրա հնարավոր կորուստը բացառելու համար: Հեղինակավոր The Athletic-ի իսպանացի լրագրող Մարիո Կորտեգանան օրեր առաջ գրել էր, որ մինչև այժմ Վինիսիուսը չէր մտածում «Ռեալից» հեռանալու մասին, իսկ այժմ նա դիտարկում է այդ տարբերակը: «Ռեալի» նախագահ Ֆլորենտինո Պերեսը շատ լավ հասկանում է իրավիճակն ու փորձում «փայփայել» բրազիլացուն: Նա առանձնազրույց ունեցավ 22-ամյա ֆուտբոլիստի հետ, իսկ «Ռայո Վալեկանոյի» դեմ «Ռեալի» վերջին տնային խաղում ամբողջ խաղադաշտը Վինիսիուսի պաստառներով էր լցված, Վինին էլ խաղին հետևում էր հենց Պերեսի կողքին նստած:
